महाराष्ट्रात होणाऱ्या स्थानिक स्वराज्य संस्थांच्या निवडणुकीत महाविकास आघाडीला सामोरे जाताना भारतीय जनता पार्टीकडून पुन्हा एकदा ‘महायुती’चा प्रयत्न केला जाण्याची शक्यता आहे.
यापूर्वी विधानसभा तसेच लोकसभा निवडणुकीत भाजपाने महायुतीचा प्रयोग यशस्वीपणे राबविला आहे. सध्या रिपब्लिकन पक्ष (आठवले), राष्ट्रीय समाज पक्ष असे लहानलहान पक्ष भाजपाबरोबर आहे. शिवसेना भाजपापासून दुरावली होती. मात्र, त्यातला एकनाथ शिंदे गट पुन्हा भाजपाबरोबर आला आहे. आता या महायुतीत राज ठाकरे यांच्या महाराष्ट्र नवनिर्माण सेनेने सहभागी व्हावे, असा प्रयत्न भाजपाकडून केला जात असल्याचे बोलले जाते.
भाजपाचे राष्ट्रीय सरचिटणिस विनोद तावडे यांनी काल राज ठाकरे यांची त्यांच्या निवासस्थानी भेट घेतली. त्यापाठोपाठ आज भाजपाचे प्रदेशाध्यक्ष चंद्रशेखर बावनकुळे यांनी राज ठाकरे यांची त्यांच्या शीवतीर्थ, या निवासस्थानी भेट घेतली. यानंतर प्रसिद्धीमाध्यमांशी बोलताना बावनकुळे यांनी ही सदिच्छा भेट होती, असे सांगितले. गणेशोत्सवानिमित्त राज ठाकरे यांना शुभेच्छा देण्यासाठी आपण गेलो होतो. महाराष्ट्रात भाजपा वाढवणे हे आपले काम आहे. युती करायची की नाही, याचा निर्णय वरिष्ठ नेते घेतील, असेही ते म्हणाले.
राज ठाकरेही घेणार दसरा मेळावा?
शिवसेनेच्या ठाकरे गटाकडून आतापासूनच दसरा मेळावा घेण्याची तयारी सुरू करण्यात आली असतानाच शिवसेनेच्या शिंदे गटानेही दसऱ्याला मेळावा घेण्याची तयारी चालवली जात असल्याचे बोलले जाते. त्यातच आता मनसेचे अध्यक्ष राज ठाकरे यांनीही दसऱ्याला मेळावा घ्यावा, असा आग्रह मनसेच्या कार्यकर्त्यांकडून ठाकरे यांच्याकडे धरण्यात आला आहे. मनसेचे नेते संदीप देशपांडे यांनी प्रसिद्धीमाध्यमांना ही माहिती दिली. हिंदुत्वाच्या विचारांचा वारसा महत्त्वाचा आहे. त्यामुळे राज ठाकरे यांनी दसऱ्याच्या दिवशी कार्यकर्त्यांना संबोधित करावे, असे कार्यकर्त्यांचे म्हणणे आहे, असेही देशपांडे यांनी सांगितले.
