मुंबईतल्या दादर माटुंगा सांस्कृतिक केंद्रातर्फे प्रीती ठाकोरभाई देसाई यांच्या स्मृतीप्रित्यर्थ केंद्राच्या सभागारात शनिवार, दिनांक १० जून रोजी सायंकाळी पाच वाजता ‘युवा महोत्सव’ आयोजित केला आहे. यात क्षितिजा सहस्त्रबुद्धे यांचा शास्त्रीय संगीताचा कार्यक्रम आणि एस. आकाश यांचा बासरीवादनाचा कार्यक्रम केंद्राच्या गोखले सभागृहात सादर करण्यात येणार आहे. हा कार्यक्रम सर्वांसाठी खुला असून अधिकाधिक रसिकांनी या कार्यक्रमांना उपस्थित राहवे, असे आवाहन केंद्राच्या वतीने करण्यात आले आहे.
क्षितिजा सहस्रबुद्धे या आग्रा, ग्वाल्हेर, जयपूर घराण्याच्या विदुषी शुभदा पराडकर यांच्या शिष्या आहेत. त्यांनी संगीत या विषयात एम. ए. केले असून संगीत अलंकार ही पदवीही प्राप्त केली आहे. काही संगीत संमेलनांमध्ये त्यांनी कार्यक्रम सादर केले आहेत. त्यांना तबल्याची साथ तेजोवृष जोशी आणि अमेय बिचु संवादिनीची साथ करतील. एस. आकाश यांनी वयाच्या चौथ्या वर्षी बासरीवादनाच्या शिक्षणाचा प्रारंभ केला आणि सातव्या वर्षी त्यांना उत्कृष्ट बालकलाकार म्हणून कर्नाटकच्या राज्यपालांकडून पुरस्कार मिळाला होता. इतरही अनेक पुरस्कार त्यांनी मिळवले आहेत. त्यांना तबल्याची साथ इशान घोष करतील.
