भारतरत्न डॉ. बाबासाहेब आंबेडकर यांची आठवण मनामध्ये कायम राहीलच. परंतु इथल्या परिसराचे सुशोभिकरण, निवसस्थानातील अंतर्गत व्यवस्था आणखी सुंदर कशी करता येईल, यासाठीचे काम निश्चितपणे करण्यात येणार असल्याचे प्रतिपादन महाराष्ट्र विधान परिषदेच्या उपसभापती डॉ. नीलम गोऱ्हे यांनी केले आहे.
युरोपमधील अभ्यासदौऱ्यावरील त्यांच्या नेतृत्त्वाखालील शिष्टमंडळाने शुक्रवारी लंडन येथील डॉ. बाबासाहेब आंबेडकर यांच्या निवस्थानाला भेट दिली. यावेळी डॉ. गोऱ्हे बोलत होत्या. याप्रसंगी केंद्र सरकारच्या नेहरू सेंटरचे संजयकुमार शर्मा, निवासस्थान व्यवस्थापक फहाद उपस्थित होते.
डॉ. बाबासाहेब आंबेडकरांच्या निवासस्थानाला महाराष्ट्र सरकारने शासकीय दर्जा दिला आहे. त्यामुळे येथील उपक्रमात सहभागी होण्याची संधी महाराष्ट्र सरकारने लोकांना उपलब्ध करून दिली आहे. हे फार चांगले पाऊल महाराष्ट्र शासनाने ऊचलले आहे. सरकारतर्फेही उत्तम निगराणी केली जात आहे. इथे असलेली व्यवस्था आणखी समृद्ध कशी करता येईल यावर आपण काम करणार असल्याचे डॉ. गोऱ्हे यांनी सांगितले.
