Homeबॅक पेजगोव्यात शुक्रवारपासून रंगणार...

गोव्यात शुक्रवारपासून रंगणार आशियाई अजिंक्यपद अ‍ॅक्रोबॅटिक जिम्नॅस्टिक्स

१४वी अ‍ॅक्रोबॅटिक जिम्नॅस्टिक्स आशियाई अजिंक्यपद स्पर्धा येत्या ३१ ऑक्टोबर ते २ नोव्हेंबरदरम्यान गोव्यात रंगणार आहे. ही प्रतिष्ठित स्पर्धा जिम्नॅस्टिक्स फेडरेशन ऑफ इंडिया यांच्या आयोजनाखाली होणार असून या स्पर्धेत आशियातील अग्रगण्य जिम्नॅस्ट आपली कौशल्ये, नियंत्रण आणि कलात्मकता दाखवणार आहेत. स्पर्धैत १९ देशांचे खेळाडू सहभागी होणार आहेत.

या स्पर्धेसाठी मुंबईतल्या चेंबूर येथील नारायण आचार्य विद्यालयातील १९ खेळाडू भारतीय संघात निवडले गेले आहेत. भारतीय संघात जागतिक खेळांचे विजेते ऋतुजा जगदाळे, अर्णा पाटील, आचल गुरव यांचा समावेश आहे. आंतरराष्ट्रीय पदकविजेते आकाश गोसावी, आदित्य खसासेही भारताचं प्रतिनिधित्व करतील. अलीकडे उत्तराखंड येथे झालेल्या राष्ट्रीय अजिंक्यपद स्पर्धेत

सर्व सुवर्णपदके जिंकणारे सान्वी शिंदे, आदित्य दिघे या स्पर्धेत भारतासाठी चांगली कामगिरी करतील, अशी आशा आहे. गोव्यात सुरू असलेल्या राष्ट्रीय प्रशिक्षण शिबिरात भारतीय संघ जोरदार तयारी करत आहे.

अनुभवी प्रशिक्षक राहुल ससाणे संघाच्या तयारीबाबत म्हणाले की, आपले खेळाडू शिस्त, निष्ठा आणि मेहनतीने प्रशिक्षण घेत आहेत. प्रत्येकाला देशाचं प्रतिनिधित्व करण्याचं महत्त्व समजलं आहे. ते आपली सर्वोत्तम कामगिरी करतील. भारतीय अ‍ॅक्रोबॅटिक जिम्नॅस्टिक्स तांत्रिक समितीचे प्रमुख सुमित एम. के. म्हणाले की, आमच्याकडे अनुभवी आणि तरुण खेळाडूंचे संतुलित मिश्रण आहे. गोव्यात ही स्पर्धा आयोजित केल्यामुळे भारतातील अ‍ॅक्रोबॅटिक जिम्नॅस्टिक्सचा दर्जा आणखी उंचावेल. आंतरराष्ट्रीय ज्युरी योगेश पवार यांनी सांगितले की, गेल्या काही वर्षांत भारतीय खेळाडूंनी तांत्रिक अचूकता आणि कलात्मक सादरीकरणात उल्लेखनीय प्रगती केली आहे. ही स्पर्धा केवळ स्पर्धात्मक दर्जा नव्हे, तर भारतीय अ‍ॅक्रोबॅटिक जिम्नॅस्टिक्सची वाढती ताकददेखील दाखवेल.

Continue reading

आता टोलनाका ओलांडतानाच तपासला जाणार गाडीचा विमा

वाहनचालकांसाठी महत्त्वाची बातमी आहे. राष्ट्रीय महामार्गावर टोलनाका ओलांडताना आता फास्टॅगद्वारे केवळ टोलच कापला जाणार नाही, तर वाहनाच्या थर्ड पार्टी विम्याची वैधताही तपासली जाणार आहे. भारतीय राष्ट्रीय महामार्ग प्राधिकरणाने (एनएचएआय)ने ही नवीन स्वयंचलित यंत्रणा सुरू केली आहे. सध्या प्रायोगिक तत्त्वावर...

आता ‘पीएफ’ची रक्कम घ्या नियमित हफ्त्याने

निवृत्तीनंतर पीएफचे पैसे एकाचवेळी काढायचे की हफ्त्याने घ्यायचे, हा प्रश्न आता सुटला आहे. कर्मचारी भविष्य निर्वाह निधी संघटना (ईपीएफओ)ने गुरुवारी सिस्टिमॅटिक विथड्रॉवल प्लॅन (एसडब्ल्यूपी)ला मंजुरी दिली. केंद्रीय कामगारमंत्री मनसुख मांडविया यांच्या अध्यक्षतेखाली झालेल्या केंद्रीय विश्वस्त मंडळ (सीबीटी)च्या २४०व्या बैठकीत...

मतदारयादीत नाव नाही? अर्ज करा ३० नोव्हेंबरपर्यंत!

महाराष्ट्रातील विशेष सखोल मतदारयादी पुनरिक्षण (एसआयआर)चे वेळापत्रक निवडणूक आयोगाने पुन्हा एकदा सुधारले आहे. केंद्रीय निवडणूक आयोगाचे अवर सचिव संदीप कुमार यांनी जारी केलेल्या पत्रानुसार, आता महाराष्ट्राची अंतिम मतदारयादी ३० नोव्हेंबरला नव्हे, तर मंगळवारी, २२ डिसेंबर २०२६ रोजी प्रसिद्ध होणार...
Skip to content