महाराष्ट्रात स्थानिक स्वराज्य संस्थांपासून लोकसभापर्यंत होणाऱ्या सर्व निवडणुका शिवसेना आणि भारतीय जनता पार्टी महायुती एकत्रितपणे लढेल, अशी घोषणा राज्याचे मुख्यमंत्री तसेच शिवसेनेचे प्रमुख एकनाथ शिंदे यांनी आज माध्यमांशी बोलताना केली. जाणकारांनी दिलेल्या माहितीनुसार या सर्व निवडणुकांमध्ये शिवसेना आणि भाजपा यांच्या जागावाटपाचे सूत्रही निश्चित झाल्याचे समजते.
मुख्यमंत्री एकनाथ शिंदे तसेच उपमुख्यमंत्री देवेंद्र फडणवीस यांनी काल रात्री केंद्रीय गृह तसेच सहकार मंत्री अमित शाह यांची राजधानी दिल्लीत भेट घेतली. या भेटीनंतर आज माध्यमांशी बोलताना शिंदे यांनी पुढच्या सर्व निवडणुका शिवसेना आणि भाजपा एकत्रपणे लढवेल, असे या बैठकीत निश्चित झाल्याचे सांगितले.
अमित शाह यांच्याबरोबर झालेल्या बैठकीत प्रत्येक निवडणुकीमध्ये शिवसेना आणि भाजपा यांच्यातील जागावाटपाचे एक सूत्र निश्चित करण्यात आले. त्याचवेळेला राज्य मंत्रिमंडळाच्या विस्ताराबद्दलही यावेळी चर्चा झाली. येत्या 19 जूनपूर्वी म्हणजेच शिवसेनेच्या वर्धापनदिनाच्या आधी हा संभाव्य मंत्रिमंडळ विस्तार होण्याची शक्यता आहे असे कळते.
मंत्रिमंडळाच्या विस्तारात महिलांनाही स्थान दिले जाईल. त्याचप्रमाणे प्रत्येक मंत्र्याला किमान एक खासदार निवडून आणण्याची जबाबदारी दिली जाईल. किंबहुना जो लोकसभेसाठी निवडणुकीत खासदार निवडून आणण्याची क्षमता राखेल त्यालाच मंत्रिपदाचे बळ दिले जाईल. याशिवाय सध्या मंत्रिमंडळात असलेल्या परंतु केंद्रीय नेतृत्त्वाच्या दृष्टीने अकार्यक्षम ठरणाऱ्या मंत्र्यांना बाहेरचा रस्ता दाखवला जाईल आणि त्या जागा खासदार निवडून आणणाऱ्या व्यक्तींच्या माध्यमातूनच भरल्या जातील, असे यावेळी ठरवण्यात आल्याचे समजते.
लोकसभा तसेच विधानसभा निवडणुकीच्या दृष्टीने हानिकारक ठरणारी वक्तव्ये करणाऱ्या मंत्रिमंडळातील सदस्यांना वेळीच आवरण्याच्या सूचनाही अमित शाह यांनी या बैठकीत केल्याचे बोलले जाते.
