राज्याचे उपमुख्यमंत्री अजित पवार त्यांच्या रोखठोक बोलण्यासाठी… करड्या शिस्तीसाठी… वेळेच्या काटेकोर नियोजनासाठी प्रसिद्ध आहेत. अजितदादांकडे सध्या अर्थसंकल्पाच्या तयारीच्या बैठका सुरू आहेत. सकाळी आठ वाजताच अजितदादा मंत्रालयात येतात आणि बैठकांमध्ये व्यस्त असतात. करड्या शिस्तीच्या, कार्यक्रमांमध्ये व्यस्त असलेल्या अजितदादांचं अनोखं रुप काल मंत्रालयातील उपस्थितांनी अनुभवलं. आपल्या व्यस्त वेळापत्रकातून वेळ काढत अजितदादांनी त्यांच्या कार्यालयातल्या चोपदारांची मुलगी आणि जावयाची भेटीची इच्छा पूर्ण केली.
दादांनी चोपदार विलास मोरे यांची मुलगी आणि जावयाला नुसती भेटच दिली नाही, तर त्यांच्याशी दिलखुलास संवादही साधला. संवाद साधताना अजितदादांनी त्यांना अनेक प्रश्नही विचारले. मुंबईत कुठे राहता, कुठल्या शाळेत शिकलात, अमेरिकेत कधी गेलात, अमेरिकेत कुठे राहत होता, तिथं कामाची वेळ कशी होती, कामाचं स्वरूप कसं असतं, तिथं छोट्या बाळाला कोण सांभाळत होतं, असे प्रश्न दादांनी विचारले. इतकंच नव्हे तर दादांनी त्यांना लग्न कसं जमलं, लव्ह की अरेंज मॅरेज? हा प्रश्नही विचारला. दोघांच्या घरच्यांचीही दादांनी आपुलकीनं चौकशी केली. अजितदादांच्या या जिव्हाळ्याच्या वागण्यानं निवृत्तीच्या उंबरठ्यावर असलेले चोपदार विलास मोरे तर कृतार्थ झालेच, पण त्यांची लेक आणि जावई अक्षरश: भारावून गेले.
त्याचं झालं असं की, उपमुख्यमंत्री कार्यालयात विलास मोरे चोपदार पदावर कार्यरत आहेत. त्यांनी आतापर्यंतच्या सेवाकाळत सचोटीनं सेवा केली. येत्या काही दिवसांत ते सेवानिवृत्त होत आहेत. चोपदार विलास मोरे यांची मुलगी स्नेहा हिचं चार वर्षांपूर्वी गणेश साळुंखे यांच्याशी लग्न झालं. त्यांचे जावई आयटी कंपनीत अमेरिकेत नोकरीला होते. हे दाम्पत्य अमेरिकेत स्थायिक होतं. मात्र, कोरोनामुळं ते पुन्हा भारतात परतले आणि इथूनंच ते काम करत आहेत. विलास मोरे यांच्या मुलीची आणि जावयाची, उपमुख्यमंत्री अजित पवार यांना भेटण्याची अनेक दिवसांपासून इच्छा होती. ही इच्छा ते वारंवार मोरे यांच्याकडे व्यक्त करत होते.
लेकीची आणि जावयाची ही इच्छा अजितदादांना सांगण्याची चोपदार विलास मोरे यांची हिंमत होत नव्हती. चोपदारांनी परवा हिंमत करुन दादांकडे मन मोकळं केलं. आपल्या मुलीला आणि जावयाला आपल्याला भेटायचं आहे, असं त्यांनी सांगितलं. त्यावर अजितदादांनी तत्काळ होकार दिला. वेळापत्रक व्यस्त असूनही दुसऱ्या दिवशीच त्यांनी या दोघांना भेटायला बोलवलं. दादांची परवानगी आणि वेळ मिळाल्यानंतर चोपदारांची मुलगी स्नेहा आणि जावई गणेश यांनी काल अजितदादांची भेट घेतली. अजितदादांनीही आपुलकी, जिव्हाळ्यानं त्यांच्याशी संवाद साधला. वैयक्तिक, कौटुंबिक चौकशी केली. मुलगी व जावयाच्या कर्तबगारीबद्दल अजितदादांनी चोपदार विलास मोरे यांचंही कौतुक केलं. अजितदादांनी केलेलं कौतुक पाहून चोपदार विलास मोरे यांच्या डोळ्यात आनंदाश्रू आले तर त्यांची लेक आणि जावई अक्षरश: भारावून गेले.
