कथा, कविता, एकपात्री, गीते अशा स्वलिखित साहित्यप्रकारांचे सादरीकरण करून मनोरंजन करणाऱ्या मेघना साने यांच्या देशपरदेशात लोकप्रिय झालेल्या ‘कोवळी उन्हे’ कार्यक्रमाचा ३००वा प्रयोग सहयोग मंदिर सभागृहात नुकताच संपन्न झाला. यावेळी मेघना साने लिखित ‘ॲडजस्टमेंट’ या कथासंग्रहाचे व ‘गुणीजनांचे कलाविष्कार’ या लेखसंग्रहाचे प्रकाशनही करण्यात आले.
पुस्तक प्रकाशनापूर्वी रसिकांच्या मनोरंजनासाठी ‘कोवळी उन्हे’ कार्यक्रम सादर करताना मेघना साने यांनी आपल्या नव्याने प्रकाशित होणाऱ्या ‘ॲडजस्टमेंट’ या कथासंग्रहातील नात्यांचे महत्त्व सांगणारी एक कथा सांगितली. हेमंत साने व आकांक्षा पालकर यांनी मेघना साने रचित व हेमंत साने यांनी संगीतबद्ध केलेले ‘तुला हवे मला हवे’ हे गीत सादर करून रसिकांची वाहवा मिळवली. कार्यक्रमानंतर लगेचच वरील दोन पुस्तकांचे प्रकाशन करण्यात आले.
डिम्पल पब्लिकेशनचे मेघना साने लिखित ‘ॲडजस्टमेंट’ या पुस्तकाचे प्रकाशन प्रसिद्ध अभिनेते प्रमोद पवार यांच्या हस्ते झाले. डॉ. अरुंधती भालेराव यांनी मेघना साने यांच्या ‘ॲडजस्टमेंट’ या पुस्तकातील कथांवर विवेचन केले. डिम्पल प्रकाशनचे कौतुक मुळे याप्रसंगी उपस्थित होते. उद्वेली बुक्सचे विवेक मेहेत्रे यांनी प्रास्ताविक केले आणि हेमंत साने यांनी आभार मानले. संपूर्ण कार्यक्रमाचे निवेदन डॉ. प्रतीक्षा बोर्डे यांनी रसाळ शैलीत केले. या कार्यक्रमाला ज्येष्ठ लेखक, समीक्षक डॉ. अनंत देशमुख, ‘राज्ञी’च्या वैशाली गायकवाड, ‘न्यूज स्टोरी टुडे’चे संपादक देवेंद्र भुजबळ, ‘ठाणे वैभव’चे मिलिंद बल्लाळ, नृत्यगुरू डॉ. किशू पाल, चित्रकार व लेखक रामदास खरे, कवी विकास भावे, शैला खांडगे यांची विशेष उपस्थिती लाभली.
