जेव्हापासून शिवसेना पक्षाचे नाव आणि चिन्ह मुख्यमंत्री एकनाथ शिंदे यांच्याकडे केंद्रीय निवडणूक आयोगाने दिले त्यानंतर होणारा शिवसेनेचा हा दुसरा दसरा मेळावा आहे. मागच्या वर्षी पहिला दसरा मेळावा शिवाजीपार्कवर घेण्यासाठी शिवसेनेचे प्रमुख, मुख्यमंत्री एकनाथ यांनी जोरदार प्रयत्न केले होते. परंतु मुंबई उच्च न्यायालयाने शिवाजीपार्कवर उद्धव ठाकरे यांना दसरा मेळावा घेण्याची अनुमती दिली. त्यानंतर शिंदे यांनी बीकेसी मैदानावर अभूतपूर्व असा दसरा मेळावा घेतला.
यंदाही शिवसेनेकडून तसेच उद्धव ठाकरेंच्या पक्षाकडून दसरा मेळाव्यासाठी शिवाजीपार्क मैदानालाच पहिली पसंती देण्यात आली. मुंबई महापालिका यावर निर्णय घेणार होती. पण त्याआधीच शिवसेनेच्या नेत्यांनी शिवाजीपार्कचा हट्ट सोडण्याचा निर्णय घेतला आणि आपला दसरा मेळावा आझाद मैदानावर घेण्याची घोषणा केली. आज या दसरा मेळाव्याचा टीझरही त्यांनी प्रसिद्ध केला.
