उद्धवजी, ज्यांच्या मांडीला मांडी लावून बसला आहात ते जर स्वातंत्र्यवीर सावरकर यांचे नाव पुसायला निघाले आहेत. धर्मांतरणाला पूर्णपणे समर्थन द्यायला निघाले आहेत… यावर आता तुमचे नेमके मत काय आहे, हेदेखील तुम्ही सांगितले पाहिजे. की सत्तेकरीता तुम्ही हाही समझोता केला का, असा सवाल भारतीय जनता पार्टीचे नेते व राज्याचे उपमुख्यमंत्री देवेंद्र फडणवीस यांनी आज माध्यमांशी बोलताना केला.
कर्नाटक सरकराने पाठ्यपुस्तकातून स्वा. सावरकरांवरील तसेच डॉ. हेडगेवार यांच्यावरील धडा वगळण्याचा निर्णय घेतला आहे. त्यावर बोलताना फडणवीस म्हणाले की, एखादा धडा तुम्ही वगळू शकता. पण लोकांच्या मनातून तुम्ही वीर सावरकर काढू शकत नाही, तुम्ही हेडगेवार काढू शकत नाही. तुम्ही एकही स्वातंत्र्यसंग्राम सेनानीना लोकांच्या मनातून काढू शकत नाही.
काँग्रेसचे सरकार आल्यानंतर यापेक्षा वेगळे काहीच अपेक्षित नाहीत. केवळ अल्पसंख्यांकांचे लांगुलचालन करण्याकरीता, ज्या प्रकारचे निर्णय कर्नाटक सरकार घेत आहे, माझा महाविकास आघाडीला सवाल आहे. तुम्ही जे सांगता की, महाराष्ट्रात कर्नाटक पॅटर्न आणणार, तो हाच कर्नाटक पॅटर्न आहे का?, असा सवालही उपमुख्यमंत्री देवेंद्र फडणवीस यांनी केला.
