महाराष्ट्र विधानमंडळाचे हिवाळी अधिवेशन येत्या २२ डिसेंबरपासून सुरू होत असून त्यामध्ये फक्त पाच दिवसांचे कामकाज होणार आहे.
दोन आठवड्यांचे हे अधिवेशन असल्याचे सांगण्यात येत असले तरी पहिल्या आठवड्यात फक्त तीन दिवस तर दुसऱ्या आठवड्यात फक्त दोन दिवस कामकाज होणार आहे. अधिवेशनाच्या पहिल्या दिवशी अध्यादेश सभागृहाच्या पटलावर ठेवणे, पुरवण्या मागण्या सादर करणे, शासकीय कामकाज आणि शोकप्रस्ताव घेण्यात येणार आहे.
दुसऱ्या दिवशी, गुरूवारी शासकीय कामकाज तसेच विरोधी पक्षांचा प्रस्ताव चर्चेला येईल. शुक्रवारी पुरवण्या मागण्यांवर चर्चा व मतदान होईल. त्याचदिवशी शासकीय तसेच अशासकीय कामकाजही केले जाईल.
दुसऱ्या आठवड्यात सोमवारी, पुरवणी विनियोजन विधेयक मांडले जाईल. शासकीय कामकाजाबरोबर अंतीम आठवडा प्रस्तावही मांडला जाईल. मंगळवारी अधिवेशनाच्या शेवटच्या दिवशी शासकीय कामकाजाबरोबर सत्तारूढ पक्षाचा प्रस्ताव मांडला जाईल.
