कोविडच्या (कोरोना) वाढत्या रूग्णसंख्येकडे पाहता रूग्णांवर त्यांच्या घरीच उपचार करण्यासाठी आता विविध रूग्णालयांनी पुढाकार घेतल्याचे दिसून येत आहे. सरकारी वा खाजगी रूग्णालयांमध्येही खाटा मिळत नसल्यामुळे अनेक रूग्णांची उपचारांअभावी आबाळ होते. अशावेळी ज्यांच्याकडे खर्च करण्याची ऐपत आहे, अशा रूग्णांना त्यांच्याच घरी उपचार करण्याचे पॅकेज या रूग्णालयांनी जाहीर केले आहे.
चार दिवसांपूर्वीच नानावटी मॅक्स सुपर स्पेशालिटी हॉस्पिटलने वृत्तपत्रांमध्ये जाहीरात देऊन कोविडच्या रूग्णांवर उपचार करण्याचे पॅकेज जाहीर केले आहे. १५ दिवसांचे हे पॅकेज ३३३ रूपये प्रतिदिन, या दरापासून सुरू होत आहे. या पॅकेजमध्ये दर तिसऱ्या दिवशी डॉक्टर टेलिफोनवर रूग्णाच्या प्रकृतीचा आढावा घेणार. दिवसातून दोन वेळा प्रशिक्षित नर्सकडून टेलिफोनवरून लक्ष देणार. नर्सकडून नियमित आढावा घेतला जाणार. रूग्णाला स्वतःची पडताळणी कशी करावी, विलगीकरणात कसे राहवे, तेथील स्वच्छता कशी असावी, याबद्दल मार्गदर्शन करणार. घरी औषधे पाठवणार. आरटीपीसीआर चाचण्यांसाठी घरून नमुने गोळा करणार. कोविड-१९चे वैद्यकीय किट (डिजीटल थर्मोमीटरसह) आणि रक्तदाब तपासण्याचे यंत्र देणे आदी सुविधा देण्यात येणार आहेत.
दरम्यान, घरी येऊन कोविड चाचणीसाठी नमुने गोळा करण्याची सेवाही आता काही प्रयोगशाळांनी सुरू केली आहे. याबाबतच्या जाहिराती समाजमाध्यमांवर येऊ लागल्या आहेत.
त्यामुळे ज्यांच्याकडे खर्च करण्याची ऐपत आहे आणि ज्यांना सौम्य स्वरूपाचा कोरोना आहे त्यांनी रूग्णालयांऐवजी रूग्णालयाच्या या घरगुती सेवेचा उपयोग करून घ्यायला हरकत नसावी, असे जाणकारांचे म्हणणे आहे.
