डिझेल तस्करी करणाऱ्या ‘जय मल्हार’, या मच्छिमारी नौकेला आणि तिच्यावरच्या पाच जणांना भारतीय तटरक्षक दलाने महाराष्ट्र किनाऱ्याजवळ गुरूवारी ताब्यात घेतले. त्यांच्याकडून सुमारे 27 लाख रुपयांचे बेहिशोबी पाच टन डिझेल आणि काही प्रतिबंधित अंमली पदार्थ जप्त करण्यात आले.
ताब्यात घेण्यात आलेली नौका, पोलीस, सीमाशुल्क आणि मत्स्योद्योग विभागाकडून चौकशी करण्यासाठी मुंबई बंदरावर आणण्यात आली. नौकेवरील व्यक्तींनी आधीच 5,000 लिटर इंधन मच्छिमारांना भरसमुद्रातच विकल्याचे पुढील तपासात उघड झाले.
या यशस्वी मोहिमेमुळे समुद्रातील डिझेलची तस्करी रोखण्यात भारतीय तटरक्षक दलाला आणखी यश प्राप्त झाले आहे. गेल्या तीन दिवसात 55,000 लिटर बेहिशोबी डिझेल जप्त करण्यात आले आहे. देशाच्या सागरी हितांचे संरक्षण करण्यासाठी आणि किनारपट्टीच्या सीमा सुरक्षित करण्यासाठी त्वरित आणि समन्वित कृतींच्या महत्त्वावर भर देत, सागरी क्षेत्रात बेकायदेशीर कृत्यांना पायबंद घालण्यासाठी सदैव प्रतिबद्ध असल्याचे भारतीय तटरक्षक दलाने पुन्हा एकदा दाखवून दिले आहे.
