आपण सहाय्यक आयुक्त म्हणून जेव्हा आपल्या कारकिर्दीला सुरुवात केली तेव्हा प्रत्यक्ष फिल्डवरील ट्रेनिंग विभागातील आयकर इन्स्पेक्टरकडूनच मिळाले. त्यामुळे नव्याने पदोन्नती मिळालेल्या सहाय्यक आयुक्तांनी आपल्या नियंत्रणाखालील अधिकाऱ्यांना खात्यामध्ये काम करण्याच्या संदर्भातील त्यांच्याकडे असलेल्या अनुभवाचे आदानप्रदान करावे, असे आवाहन नागपूरच्या प्रधान मुख्य आयकर आयुक्त रीना त्रिपाठी यांनी काल केले.
आयकर अधिकाऱ्यांमधून पदोन्नती मिळालेल्या आयकर सहायक आयुक्त यांच्या ‘उत्तरायण’ या प्रशिक्षण वर्गाच्या उद्घाटनाप्रसंगी नागपूरच्या छिंदवाडा रोडवरील राष्ट्रीय प्रत्यक्ष कर अकॅडमी एनएडीटी येथे त्या बोलत होत्या. याप्रसंगी एनएडीटीचे प्रशिक्षण महासंचालक आनंद बैवार, अतिरिक्त महासंचालक (प्रशासन) मनीष कुमार तसेच ‘उत्तरायण’, या प्रशिक्षणाचे प्रशिक्षण संचालक आणि अतिरिक्त महासंचालक आकाश देवांगन आदी मान्यवर उपस्थित होते.
आयकर विभागात काम करत असताना आयकर अधिकाऱ्यांनी डिजीटली सक्षम राहणे आवश्यक असून आयकर विभागाच्या फेसलेस असेसमेंट, सायबर फॉरेंसिक्स तसेच डिजिटल सबमिशन यासारख्या उपक्रमांमध्ये कौशल्य संपादन केल्यास ते करदात्यांना उत्तम सेवा उपलब्ध करून देऊ शकतात, असेही त्या म्हणाल्या.
या कार्यक्रमात स्वागतपर भाषण एनएडीटीचे प्रशिक्षण महासंचालक आनंद बैवार यांनी केले. अतिरिक्त महासंचालक (प्रशासन) मनीष कुमार यांनी याप्रसंगी नवपदोन्नत अधिकाऱ्यांना कर प्रशासकाची शपथ दिली. या प्रशिक्षणाचे प्रशिक्षण संचालक आकाश देवांगन यांनी सांगितले की, सात आठवड्यांपेक्षा जास्त चालणाऱ्या या ‘उत्तरायण’ प्रशिक्षणामध्ये नवपदोन्नत सहाय्यक आयुक्तांना आयकर प्रशासनाच्या सर्व बाबींवर प्रशिक्षण दिले जाते. त्यांचे ज्ञान आणि कौशल्य वृद्‌धीकरीता तसेच करसंकलनात करचुकवेगिरीचा सामना करण्याचे प्रशिक्षण, मनी लॉन्ड्रिंग या आर्थिक घोटाळ्यांसारख्या आर्थिक गुन्ह्याचा सामना करण्यासाठी प्रशिक्षण दिले जाते. यामध्ये एक आठवड्याच्या भारत दर्शन कार्यक्रमाचादेखील समावेश असतो.
याप्रसंगी सहाय्यक प्रशिक्षण संचालक अरविंद कुमार वर्मा यांनी या तुकडीची माहिती दिली. या तुकडीत 131 अधिकारी प्रशिक्षणार्थी असून त्यापैकी 38 महिला आहेत. या प्रशिक्षणार्थी अधिकाऱ्यांमध्ये सर्वात जास्त संख्या महाराष्ट्रातल्या अधिकाऱ्यांची आहे. या तुकडीचे सरासरी वय 54 वर्षे असून या तुकडीतील अधिकाऱ्यांनी सुमारे 20 ते 25 वर्षे सेवा आपल्या विभागात दिल्यानंतर त्यांना ही पदोन्नती मिळाली आहे.
या कार्यक्रमाचे आभारप्रदर्शन सहाय्यक प्रशिक्षण संचालक अभिनव मिश्रा यांनी केले. याप्रसंगी रीना त्रिपाठी यांनी एनएडीटी परिसरात वृक्षारोपणदेखील केले.
