मुंबईच्या गिरगावातील कांदेवाडी येथील श्री अक्कलकोट स्वामी समर्थ मठाला ८ ऑक्टोबर २०२३ रोजी १२५ वर्षे पूर्ण होत आहेत. त्यानिमित्ताने ५ ते ८ ऑक्टोबर या कालावधीत विविध कार्यक्रमांचे आयोजन करण्यात आले आहे.
५ आणि ६ ऑक्टोबरला रक्तदान शिबिराचे आयोजन करण्यात आले आहे. साहित्य संघ मंदिर येथे ७ ऑक्टोबरला होणाऱ्या भव्य उद्घाटन कार्यक्रमात स्वामी समर्थ भक्तांचे स्वामीविषयींची श्रद्धा तसेच अनुभव यांचे निवडक वाचन होईल. हे अनुभव २३ सप्टेंबरपर्यंत पोहोचतील, असे पाठवावेत. यावेळी मान्यवरांचा सत्कारदेखील होईल.
गुरू अर्चना पालेकर यांच्या संस्थेतर्फे श्री गुरुदेव दत्त हा शास्त्रीय नृत्याचा कार्यक्रमदेखील होईल. त्यानंतर सुप्रसिद्ध गायिका पद्मजा फेणाणी जोगळेकर यांचे गायन होईल. ८ ऑक्टोबरला मठात विविध धार्मिक कार्यक्रम होतील. सकाळी लघुरुद्राभिषेक, दुपारी चार वाजता श्री समर्थ महाराजांच्या नामस्मरणाचा गजर आणि रात्री ७.४५ वाजता आरती होऊन कार्यक्रमाची सांगता होईल. अधिकाधिक भक्तांनी या कार्यक्रमात सहभागी व्हावे, असे आवाहन विश्वस्त प्रशांत मुळेकर यांनी केले आहे.
