ज्येष्ठ गायक व संगीतकार प्रकाश शिवाजीराव येवारे यांचे आज पहाटे डोंबिवली येथील राहत्या घरी झोपेतच निधन झाले. ते ५० वर्षांचे होते. त्यांच्या पश्चात पत्नी, मुलगा, आई-वडील, दोन विवाहीत बंधू, एक विवाहीत बहिण, दोन पुतणे, दोन भाच्या, एक नात असा मोठा परिवार आहे.
प्रकाश हे उत्तम गायक, संगीतकार व संगीत शिक्षक होते. ते डोंबिवली येथे संगीताचा क्लास चालवीत. त्यांच्या हाताखाली संगीताचे धडे गिरविलेल्या अनेक तरुण-तरुणींनी टीव्ही चॅनेल्सवरील विविध रिएलिटी शोमध्ये गायनात आणि संगीतात घवघवीत यश मिळविले आहे. प्रकाश यांनी एक-दोन मराठी मालिकांनादेखील पार्श्वसंगीत दिले होते.
प्रकाशजी हे कलाकार म्हणून जितके मोठे होते तितकेच ते माणूस म्हणूनदेखील मोठे होते. संगीत क्लासची फी भरण्याची क्षमता नसलेल्या अनेक कलाकारांना त्यांनी न कुरकुरता मोफत प्रशिक्षण दिले. मुंबई मराठी पत्रकार संघाचे अध्यक्ष नरेंद्र वि. वाबळे यांचे ते मेहुणे होत.
आज दुपारी डोंबिवली येथील शिवमंदिर स्मशानभूमीत त्यांच्यावर अंत्यसंस्कार करण्यात आले. त्यांचे चिरंजीव यश यांनी त्यांच्या चितेला अग्नी दिला.
