इजिप्तमधील कैरो येथे २८ फेब्रुवारी ते ८ मार्च या दरम्यान आयोजिलेल्या नेमबाजीच्या विश्वचषक स्पर्धेत मराठमोळ्या रुचिता विनेरकर आणि तिच्याबरोबरच्या निवेथा आणि इशा सिंग यांनी स्पर्धेच्या १० मीटर एअर पिस्तूल सांघिक प्रकारात भारताला सुवर्णपदक मिळवून दिले आहे.
रुचिता मुंबईच्या स्वातंत्र्यवीर सावरकर राष्ट्रीय स्मारकातील सावरकर रायफल क्लबच्या सदस्य असून त्यांच्या या कामगिरीमुळे सावरकर स्मारकाच्या रायफल क्लबची कामगिरी आता अधिक उंचावली आहे.
रुचिता विनेरकर रेल्वेच्या कर्मचारी असून सावरकर रायफल क्लबमध्ये नियमित सरावासाठी येतात. गुरुवार, ३ मार्चला त्यांनी एअर पिस्तुल प्रकारातील सांघिक स्पर्धेत केलेल्या स्पृहणीय कामगिरीमुळे भारतीय संघ सुवर्णपद मिळवू शकला. भारताच्या या महिला त्रिकुटाने १६ अचूक लक्ष्यवेध करताना भारताच्या खात्यावर दुसरे सुवर्ण आणि एकूण तिसरे पदक जमा केले. दोन सुवर्ण आणि एक रौप्यपदकासह भारतीय संघ गुणतालिकेत आघाडीवर आहे..
यानिमित्ताने सावरकर स्मारकाच्यावतीने रुचिता विनेरकर यांचा सत्कार करण्यात येणार आहे, अशी माहिती स्मारकाचे कार्यवाह राजेंद्र वराडकर तसेच रायफल क्लबचे विश्वजीत शिंदे यांनी दिली. हा समारंभ सावरकर स्मारकाच्या सभागृहात आज, रविवारी ६ मार्चला होत आहे.
