येत्या बुधवारी, दि. २८ जून २०२३ रोजी बकरी ईदनिमित्त सार्वजनिक सुट्टी आहे. त्यामुळे बुधवारी मुंबईतल्या भायखळा येथील पूर्वाश्रमीची राणीची बाग म्हणजेच वीरमाता जिजाबाई भोसले वनस्पती उद्यान व प्राणिसंग्रहालय जनतेकरिता खुले राहणार आहे. दुसऱ्या दिवशी म्हणजे गुरुवार, दि. २९ जून २०२३ रोजी वीरमाता जिजाबाई भोसले वनस्पती उद्यान व प्राणिसंग्रहालय बंद असेल, असे मुंबई महापालिकेने जाहीर केले खरे.. पण नंतर शासनाने ईदची सुट्टी गुरूवारी असल्याचे परिपत्रक काढल्याने पालिकेने पुन्हा हे उद्यान नेहमीप्रमाणे बुधवारी बंद राहील आणि गुरूवारी सुरू राहील, असे जाहीर केले आहे.
भायखळा (पूर्व) परिसरातील वीरमाता जिजाबाई भोसले वनस्पती उद्यान व प्राणिसंग्रहालय साप्ताहिक सुट्टीनिमित्त दर बुधवारी बंद असते. मात्र, बृहन्मुंबई महानगरपालिकेने यापूर्वी मंजूर केलेल्या एका ठरावानुसार बुधवारी सार्वजनिक सुट्टी आल्यास त्यादिवशी वनस्पती उद्यान व प्राणिसंग्रहालय जनतेसाठी खुले असते व दुसऱ्या दिवशी बंद ठेवण्यात येते. यानुसार बुधवार दि. २८ जून २०२३ रोजी वीरमाता जिजाबाई भोसले वनस्पती उद्यान आणि प्राणिसंग्रहालय जनतेसाठी खुले राहणार असल्याचे पालिका प्रशासनाकडून कळविण्यात आले होते. आता त्आयात बदल करण्यात आला आहे.
