मुंबईतल्या दादर येथील ८२ वर्षीय जुनी सुप्रसिद्ध अखिल भारतीय कीर्तन संस्था, या नामांकीत संस्थेचे अध्यक्षपद गेली अनेक वर्षे समर्थपणे सांभाळणारे सुरेश उपाध्ये यांचे शुश्रुषा रुग्णालयात गुरुवारी सकाळी निधन झालं.
शिक्षकी नोकरीतून निवृत्त झाल्यावर आपल्या जीवनाचा उर्वरीत काळ त्यांनी कीर्तन संस्थेला दिला. कीर्तन संस्थेचा आर्थिक तसेच सर्व प्रकारचा कारभार त्यांनी निस्पृहपणे चोखपणे सांभाळला. उत्तम वक्तृत्त्व, शिस्तप्रिय आणि मोत्यासारखे सुंदर अक्षर, सुरुवातीपासून शेवटपर्यंत एकाच लयीत, एका ओळीत, सुबकपणे सर लिहीत. आजपर्यंत अनेक कीर्तनकार घडवण्यात तसेच कीर्तन संस्थेचे वर्षभर विविध उपक्रम त्यांनी राबवले. आजारपणातसुद्धा कीर्तन संस्थेचाच विचार त्यांच्या मनात होता.
संस्थेच्या आणि त्यांच्याशी निगडित संस्थांच्या वतीने २० डिसेंबर रोजी संस्थेच्या सभागृहात डी. एल. वैद्य मार्ग, दादर येथे शोकसभेचे आयोजन केले असल्याचं संस्थेचे प्रमुख विश्वस्त रवींद्र आवटी यांनी सांगितले.
