राष्ट्रपती द्रौपदी मुर्मू यांचे आज २ दिवसांच्या भेटीसाठी मुंबईत आगमन झाले. राष्ट्रपतींचे छत्रपती शिवाजी महाराज आंतरराष्ट्रीय विमानतळ येथे आगमन झाले. राज्यपाल रमेश बैस, मुख्यमंत्री एकनाथ शिंदे, उपमुख्यमंत्री देवेंद्र फडणवीस यांनी राष्ट्रपतींचे स्वागत केले. आगमनानंतर लगेचच राष्ट्रपती द्रौपदी मुर्मू यांना तिन्ही सैन्यदलांतर्फे मानवंदना देण्यात आली.
राष्ट्रपतींनी आज दुपारी श्री सिद्धिविनायक मंदिराला भेट दिली. यावेळी राज्यपाल रमेश बैसदेखील उपस्थित होते. श्री सिद्धिविनायक मंदिर न्यासाचे अध्यक्ष आदेश बांदेकर यांनी राष्ट्रपतींचे स्वागत केले. संध्याकाळी महाराष्ट्र शासनातर्फे त्यांचा राजभवन येथे नागरी सत्कार करण्यात येणार आहे.
उद्या दि. ७ रोजी राष्ट्रपती राजभवनातील ‘क्रान्तिगाथा’ या ब्रिटिशकालीन भूमिगत बंकरमध्ये तयार करण्यात आलेल्या क्रांतिकारकांच्या दालनाला भेट देणार असून त्यानंतर त्या शिर्डीकडे रवाना होणार आहेत.
