बृहन्मुंबई महानगरपालिकेच्या करनिर्धारण व संकलन खात्याकडून विहित कालावधीमध्ये मालमत्ता कर न भरणाऱ्या मालमत्ताधारकांवर लक्ष केंद्रित करण्यात आले आहे. सन २०२३-२४ या आर्थिक वर्षासाठी २५ मे २०२४ हा मालमत्ता करभरणा करण्याचा अंतिम दिवस आहे. त्यामुळे मालमत्ताधारकांनी मुदतीपूर्वी करभरणा करुन संभाव्य दंडाची कारवाई टाळावी, असे आवाहन मुंबई महापालिकेने केले आहे.
करसंकलन व करआकारणी विभागाच्या वतीने करवसुली करण्यासाठी विविध प्रकारचे प्रयत्न केले जात आहेत. समाजमाध्यमांद्वारे संपर्क करुन तसेच गृहनिर्माण संस्थेतील सदनिकानिहाय करवसुलीचे कामकाज कार्यरत आहे. मालमत्ताधारकांना करभरणा करण्यासाठी प्रोत्साहित करण्याच्या उद्देशाने पालिकेच्या वतीने विविध माध्यमांतून जनजागृती तसेच आवाहन करण्यात आले आहे. तथापि, अद्यापही करभरणा न केलेल्या मालमत्ताधारकांनी वेळीच कर जमा करुन दंडात्मक तसेच कायदेशीर कारवाई टाळावी, असे आवाहन करण्यात आले आहे.
पालिकेने कर भरण्यासाठी पाठपुरावा केलेल्या ‘टॉप टेन’ मालमत्ताधारकांची नावे-
१) रिलायंस कन्स्ट्रक्शन (जी दक्षिण विभाग)– ४ कोटी ४० लाख ६४ हजार ७१६ रूपये
२) बाबुलाल आगरवाल अॅण्‍ड आदर्स (पी दक्षिण विभाग)– ४ कोटी ३० लाख ४७ हजार रूपये
३) एसजीपी कम्‍युनिटी प्रायव्‍हेट लिमिटेड (एस विभाग)- ३ कोटी ७५ लाख १७ हजार ६१२ रुपये
४) अरिहंत रिअॅलिएटर्स (एम पश्चिम विभाग)- ३ कोटी ५५ लाख ६३ हजार ९९३ रुपये
५) टान्‍सकॉन एंटरप्रायजेस (के पश्चिम विभाग)- ३ कोटी ५२ लाख ४० हजार ३७८ रुपये
६) इंडियन फार्म्‍यास्‍युटीकल असोसिएशन (एच पूर्व विभाग)- ३ कोटी ३८ लाख ६८ हजार ७१० रुपये
७) चान्द जाम योगी स्‍मृती (एच पश्चिम विभाग)- ३ कोटी १० लाख ८२ हजार ७८९ रुपये
८) एसजीएफ एंटरप्रायजेस (पी उत्‍तर विभाग)- ३ कोटी ०७ लाख ५२ हजार ६६८ रुपये
९) हेलिसिटीट रेसिडेंसी प्रायव्‍हेट लिमिटेड (डी विभाग)- २ कोटी ७४ लाख ३८ हजार ९२७ रुपये
१०) श्री समर्थ स्‍पार्क डेव्‍हलपर्स (टी विभाग)- २ कोटी ७२ लाख ७ हजार ५० रुपये
