नागरिकांना पारपत्राबाबतच्या (पासपोर्ट) कामांसाठी लवकरात लवकर भेटीची वेळ (अपॉइंटमेंट) उपलब्ध करून देण्यासंदर्भात केंद्रीय परराष्ट्र व्यवहार मंत्रालयाने हाती घेतलेल्या उपक्रमाचा भाग म्हणून, मुंबईच्या सर्व प्रादेशिक पारपत्र कार्यालयांतील कामकाज येत्या तीनही शनिवारी म्हणजेच 10, 17 आणि 24 डिसेंबर 2022 यादिवशी सकाळी 9 ते संध्याकाळी साडेपाच या वेळात नियमित स्वरुपात सुरू राहणार आहे.
10 डिसेंबर 2022 यादिवशी पारपत्र कार्यालयातील कामासाठी ऑनलाईन पद्धतीने भेटीची वेळ उपलब्ध आहे तर 17 डिसेंबर आणि 22 डिसेंबर 2022 यादिवशीच्या भेटीच्या वेळा अनुक्रमे 14 डिसेंबर आणि 21 डिसेंबर 2022 यादिवशी उपलब्ध होतील.
https://www.passportindia.gov.in या संकेतस्थळावर ऑनलाईन पद्धतीने अर्ज तसेच शुल्क भरून भेटीची नवीन वेळ मिळवण्यासाठी नोंदणी करता येईल. अर्जदाराला पुन्हा याच संकेतस्थळावर लॉग इन करून शुल्क भरले गेल्याची तसेच भेटीच्या वेळेच्या तारखेची खातरजमा करता येईल. भेटीच्या वेळेची निश्चित माहितीदेखील पोर्टलवर मिळेल.
ज्या अर्जदारांना पारपत्राच्या कामासाठी नंतरच्या काळातील भेटीच्या वेळा मिळाल्या आहेत किंवा ज्यांना आधीच्या भेटीच्या वेळेच्या दिवशी कार्यालयात हजर राहणे शक्य झाले नसेल त्यांना उपरोल्लेखित तीन शनिवारी त्यांच्या भेटीच्या वेळेसाठी अर्ज करता येईल. अशा अर्जदारांना ही तारीख एकदाच बदलण्याची परवानगी देण्यात आली आहे.
