मुंबईमध्ये सेवाभावी वृत्तीने काम करणाऱ्या डबेवाल्यांना परवडणाऱ्या किंमतीत घरे देण्याचा निर्णय शिंदे-फडणवीस सरकारने घेतला आहे. उपमुख्यमंत्री देवेंद्र फडणवीस यांनी शुक्रवारी गृहनिर्माण विभागाचे अधिकारी व डबेवाले संघटनेच्या प्रतिनिधींबरोबर घेतलेल्या बैठकीत हा निर्णय झाल्याची माहिती भारतीय जनता पार्टीचे नेते आमदार श्रीकांत भारतीय यांनी एका पत्रकार परिषदेत दिली.
भाजपा प्रदेश कार्यालयात झालेल्या या पत्रकार परिषदेला डबेवाला ट्रस्टचे अध्यक्ष उल्हास मुके, डबेवाला असोसिएशनचे अध्यक्ष रामदास करवंदे व भाजपा प्रदेश माध्यम विभागप्रमुख नवनाथ बन आदी उपस्थित होते.
१८९०पासून मुंबईमध्ये सेवा पुरवणाऱ्या डबेवाल्यांना मालकीची घरे मिळावीत, अशी मागणी अनेक वर्षांपासून करण्यात येत होती. याबाबत आपण विधिमंडळाच्या मागील अधिवेशनात लक्षवेधी सूचना मांडली होती. त्यावेळी फडणवीस यांनी डबेवाल्यांना घरे देण्याचे आश्वासन दिले होते. त्यानुसार आजच्या बैठकीचे आयोजन केले होते. म्हाडा, सिडको तसेच महसूल विभागाकडून जागा घेऊन डबेवाल्यांना परवडणाऱ्या किंमतीत घरे उपलब्ध करून देण्याचा निर्णय या बैठकीत घेण्यात आला, असे त्यांनी सांगितले.
डबेवाल्यांना त्यांची सेवा देणे सोईस्कर होईल अशा ठिकाणी त्यांना घरे देण्यात येतील. डबेवाल्यांना त्यांच्या कामकाजाची माहिती देण्यासाठी उपयुक्त असलेले मुंबई डबेवाला भवन आंतरराष्ट्रीय स्तरावरचे करण्यासाठी सरकार प्रयत्नशील असल्याचेही भारतीय यांनी स्पष्ट केले.
