राज्यसभेवर नुकतीच निवड झालेल्या रामराव वडकुते यांचा भव्य सत्कार मुंबई मराठी पत्रकार संघाच्या लोकमान्य सभागृहात नुकताच उत्साहात पार पडला. इंडिया मीडिया लिंक अँड इव्हेंट्स मॅनेजमेंट, मुंबई यांच्या वतीने या सत्कार सोहळ्याचे आयोजन करण्यात आले. या कार्यक्रमाचे आयोजन कंपनीचे संचालक के. रवि (दादा) यांच्या पुढाकाराने करण्यात आले. कार्यक्रमादरम्यान समाजातील विविध प्रश्न, ग्रामीण भागातील समस्या, वंचित घटकांच्या अडचणी तसेच सर्वसामान्य नागरिकांशी संबंधित विषयांवर जाहीर सविस्तर चर्चा करण्यात आली.
आपल्या मनोगतात के. रवि (दादा) यांनी सांगितले की, समाजाशी नाळ जोडून राहणे ही प्रत्येक व्यक्तीची नैतिक जबाबदारी आहे. समाजात राहून समाजासाठी काम करण्याची जाणीव प्रत्येकाने ठेवली पाहिजे. प्रत्येक नागरिकाने आपल्या परीने छोटासा का होईना, पण समाजासाठी खारीचा वाटा उचलणे आवश्यक आहे.
यावेळी सत्कारमूर्ती खासदार रामराव वडकुते यांनी राज्यसभेतून काम करताना ग्रामीण भागातील समस्या, वंचित घटकांचे प्रश्न तसेच सर्वसामान्य नागरिकांच्या अडचणी सोडवण्यासाठी केंद्र सरकारच्या माध्यमातून प्रामाणिकपणे प्रयत्न करणार असल्याचे सांगितले. जनतेने व्यक्त केलेला विश्वास पूर्ण करण्यासाठी सातत्याने कार्यरत राहण्याचा निर्धार त्यांनी व्यक्त केला.
कार्यक्रमाची प्रस्तावना प्रीतम आठवले यांनी केली. कार्यक्रमाचे प्रभावी सूत्रसंचालन सुरेश यादव यांनी केले. उपस्थित मान्यवरांचे आभार अॅड. शंकर चव्हाण यांनी मानले. या कार्यक्रमाला चित्रपट अभिनेते अली खान, डॉ. वकील, धनलक्ष्मी कृष्णअय्यर, के टी गोलानी, यशवंत वानखेडे, बाळासाहेब किसवे तसेच चेतमन खडस (नेपाळ असोसिएशन, अध्यक्ष) यांच्यासह विविध क्षेत्रातील मान्यवर उपस्थित होते. बाला वाडीयार, कन्नू यादव, नितीन पाटील, रॉकी फ़र्नान्डिस, अरुण वडनेरे आदींनी कार्यक्रम यशस्वी करण्यासाठी विशेष परिश्रम घेतले.
