बृहन्मुंबई महानगरपालिकेच्या निवृत्त कर्मचाऱ्यांना संबंधित नियमांनुसार दरमहा निवृत्तीवेतन देण्यात येते. याबाबत उपलब्ध झालेल्या माहितीनुसार पालिकेचे साधारण १ लाख ९ हजार ६४१ निवृत्तीवेतनधारक आहेत. यापैकी साधारण ७४ हजार ९५२ इतक्या निवृत्तिवेतनधारकांचे ‘प्रपत्र-१६’ (फॉर्म-१६) पालिकेतर्फे उपलब्ध करून देण्यात आलेले आहेत. या निवृत्तीवेतनधारकांना त्यांच्या स्तरावर आयकर व परतावाविषयक कार्यवाही करणे गरजेचे असते. या अनुषंगाने निवृत्तीवेतनधारकांना ऑनलाईन पद्धतीने आर्थिक वर्ष २०२२-२३चे आयकरविषयक ‘प्रपत्र-१६’ उपलब्ध करुन देण्यात आले आहेत. त्यामुळे निवृत्तीवेतनधारकांना घरबसल्या आवश्यक ती संबंधित कार्यवाही करणे सुलभ होईल, अशी माहिती पालिकेच्या प्रमुख लेखापाल (कोषागार) विभागाच्या सुलोचना कवडे यांनी दिली आहे.
मुंबई महापालिकेतर्फे सालाबादप्रमाणे कर्मचारी तथा निवृत्तीवेतनधारक यांना आर्थिक वर्ष २०२२-२३चे आयकरविषयक ‘प्रपत्र-१६’ ऑनलाईन पद्धतीने उपलब्ध करुन देण्यात आले आहेत.
१. सदर ऑनलाईन प्रपत्रे कोणत्याही इंटरनेट ब्राऊझरचा उपयोग करुन प्राप्त करता येऊ शकतील.
२. इंटरनेट ब्राऊझर ओपन केल्यानंतर ‘https://form16.mcgm.gov.in’ या संकेतस्थळावर लॉगीन करावे.
३. दिलेल्या चौकोनामध्ये कर्मचारी संकेतांक नमूद करणे.
४. त्याखालील चौकोनामध्ये ‘पॅन’ क्रमांकाची अचूक नोंद करावी.
५. कर्मचारी संकेतांक आणि पॅन क्रमांकाची नोंद केल्यावर स्क्रीनवर दिसणाऱ्या captcha code दिलेल्या चौकोनामध्ये अचूक नोंद करणे.
६. नंतर ‘कन्फर्म’ (confirm) वर क्लिक करावे.
आपला ‘FORM 16’ दोन भागांमध्ये म्हणजे ‘भाग अ’ (PART A) आणि ‘भाग ब’ (PART B) स्क्रीनवर दिसेल. ‘भाग अ’ (PART A) हा आर्थिक वर्ष २०२२-२३ मध्ये बृहन्मुंबई महानगरपालिकेकडून एकूण वजा केलेल्या आयकराशी संबंधित आहे आणि ‘भाग ब’ (PART B) हा आर्थिक वर्ष २०२२-२३ मधील उत्पन्न, गुंतवणूक व त्यावरील आयकर यांचा तपशील आहे. त्यानंतर ‘डाऊनलोड’ (Download) वर क्लिक करावे.
‘भाग अ’ (PART A) मधील एकूण वजा केलेली आयकराची रक्कम, ‘भाग ब’ (PART B) मध्ये नमूद केलेल्या देय आयकराच्या रकमेतून वजा करुन योग्य ती आयकर देय किंवा परताव्याची रक्कम मिळवावी आणि निर्धारित वेळेत इन्कम टॅक्स रिटर्न आयकर खात्याला सादर करावे. आर्थिक वर्ष २०२२-२३ चे प्रपत्र–१६ महापालिकेच्या संकेतस्थळावर फक्त ३१ मार्च २०२४ पर्यंत उपलब्ध राहील, याची निवृत्तीवेतनधारकांनी नोंद घ्यावी.
आयकर विभागाच्या नियम क्रमांक 26C नुसार आर्थिक वर्ष २०२३-२४करिता निवृत्तीवेतनधारकांनी केलेल्या आयकर बचतीच्या गुंतवणुकीची कागदपत्रे तसेच गृहकर्ज घेतले असल्यास वित्तीय संस्थेच्या ‘पॅन’ क्रमांकासह सर्व माहिती ‘प्रपत्र-१२ बीबी’ (12BB) मध्ये नमूद करुन ते पुढील पत्त्यावर दिनांक ३० सप्टेंबर २०२३पर्यंत पुढील पत्त्यावर सादर करावेः निवृत्तीवेतन (आयबी) विभाग, ‘ई’ विभाग कार्यालय, भायखळा (पश्चिम). मुंबई ४००००८.
