महाराष्ट्राचे पर्यटन संचालनालय तसेच महाराष्ट्र पर्यटन विकास महामंडळ या दोन प्रमुख संस्था पर्यटन विभागांतर्गत असल्या तरी त्यांचे बोधचिन्ह, घोषवाक्य यामध्ये तफावत होती. ती तफावत आता दूर करण्यात आली असून आता ‘महाराष्ट्र टुरिझम’ हे बोधचिन्ह (लोगो) आणि ‘महाराष्ट्र अनलिमिटेड’ हे घोषवाक्य (टॅगलाईन) असेल, असा निर्णय राज्य सरकारने घेतला आहे.
पर्यटन मंत्री गिरीश महाजन यांनी ही माहिती दिली. राज्यातल्या पर्यटनस्थळांची राष्ट्रीय, आंतरराष्ट्रीय स्तरावर मोठ्या प्रमाणावर प्रसिद्धी, प्रचार करून पर्यटनवाढीला चालना देण्यासाठी शासन कार्यरत आहे. देशातील एक अग्रगण्य राज्य बनवून मोठ्या प्रमाणात पर्यटकांना आकर्षित करण्याकरीता नुकतेच ‘पर्यटन धोरण 2024’ राज्यात जारी करण्यात आले आहे. येत्या काळामध्ये राज्यातील पर्यटनवाढीसाठी महत्त्वपूर्ण योजना आणि उपक्रम राबविण्यात येणार आहेत, असेही महाजन यांनी सांगितले.
