पश्चिम आशियातील युद्ध आता एका निर्णायक आणि भयानक वळणावर येऊन ठेपले आहे. अमेरिकेचे राष्ट्राध्यक्ष डोनाल्ड ट्रम्प यांनी इराणला दिलेल्या कठोर इशाऱ्यानंतर, इराणने आपल्या देशातील वीजनिर्मिती केंद्र आणि पायाभूत सुविधा वाचवण्यासाठी अनोखी शस्त्रास्त्रे वापरण्याऐवजी ‘मानवी ढाल’ (ह्यूमन शिल्ड) तयार करण्याचा निर्णय घेतला आहे. इराणचे क्रीडा आणि युवक व्यवहार उपमंत्री अलीरेझा राहिमी यांनी एक व्हिडिओ संदेश प्रसिद्ध करून देशातील तरुणांना, कलाकारांना आणि खेळाडूंना आवाहन केले आहे. त्यांनी म्हटले आहे की, “देशातील वीजप्रकल्प ही आपली राष्ट्रीय संपत्ती आहे. राजकीय मतभेद बाजूला ठेवून, इराणच्या भविष्यासाठी सर्व तरुणांनी, विद्यार्थ्यांनी आणि प्राध्यापकांनी मंगळवारी दुपारी २ वाजल्यापासून (स्थानिक वेळ) या प्रकल्पांच्या भोवती ‘मानवी साखळी’ तयार करावी.” या मोहिमेला ‘उज्ज्वल भविष्यासाठी इराणी तरुणांची मानवी साखळी’ असे नाव देण्यात आले असून, यात हजारो नागरिक सहभागी होण्याची शक्यता वर्तवण्यात येत आहे.
पायाभूत सुविधांवरील हल्ला हा ‘युद्ध गुन्हा’
इराणी उपमंत्र्यांनी जागतिक समुदायाचे लक्ष वेधताना म्हटले आहे की, नागरी सुविधांवर आणि वीज प्रकल्पांवर हल्ले करणे हा आंतरराष्ट्रीय कायद्यानुसार एक ‘युद्ध गुन्हा’ आहे. “आम्ही एकमेकांचे हात पकडून जगाला सांगू इच्छितो की, नागरिकांचे जीवन आणि त्यांच्या जगण्यासाठीच्या अत्यावश्यक सुविधा ही युद्धक्षेत्रातील लक्षे असू शकत नाहीत,” असेही त्यांनी स्पष्ट केले आहे.
अमेरिकेचा कठोर इशारा: ‘स्ट्रेईट ऑफ होर्मुझ’वरून तणाव
दरम्यान, अमेरिकेचे राष्ट्राध्यक्ष डोनाल्ड ट्रम्प यांनी इराणला शेवटची डेडलाईन दिली आहे. त्यांनी स्पष्ट केले आहे की, जर इराणने ‘स्ट्रेईट ऑफ होर्मुझ’ हा महत्त्वाचा सागरी व्यापार मार्ग पूर्णपणे आणि सुरक्षितपणे वाहतुकीसाठी मोकळा केला नाही, तर अमेरिका इराणच्या ऊर्जाप्रकल्पांना आणि पुलांना उद्ध्वस्त करेल. ही डेडलाईन आज रात्री उशिरा संपत आहे.
- ट्रम्प यांचा अल्टीमेटम: मंगळवारी रात्री ८ वाजतापर्यंत (वॉशिंग्टन वेळ) इराणला निर्णय घेण्याची वेळ देण्यात आली आहे. “एका रात्रीत संपूर्ण देश (इराण) अंधारात जाऊ शकतो. वीजप्रकल्प, पूल आणि पायाभूत सुविधांना आम्ही अशा प्रकारे लक्ष्य करू की, त्या पुन्हा कधीही वापरता येणार नाहीत,” असे धक्कादायक विधान ट्रम्प यांनी व्हाईट हाऊसच्या पत्रकार परिषदेत केले आहे.
- इस्रायलचा इशारा: इस्रायली लष्कराने इराणी नागरिकांना आज रात्री ९ वाजेपर्यंत रेल्वेचा प्रवास न करण्याचा इशारा दिला असून, रेल्वे मार्गांना लक्ष्य करण्याचे संकेत दिले आहेत.
- संयुक्त राष्ट्र: युएन सुरक्षा परिषदेत आज ‘स्ट्रेईट ऑफ होर्मुझ’ संदर्भात एका महत्त्वपूर्ण ठरावावर मतदान होण्याची शक्यता आहे.
