“गुगल”ने वर्षातील त्यांच्या सर्वात मोठ्या इव्हेंटच्या तारखा निश्चित केल्या आहेत. “गुगल आय/ओ 2025” हा इव्हेंट 20 आणि 21 मे रोजी कॅलिफोर्नियातील माउंटन व्ह्यू येथे होणार आहे. गुगल आय/ओ ही प्रामुख्याने एक डेव्हलपर कॉन्फरन्स आहे. परंतु गुगलने गेल्या काही वर्षांत नवीन ॲप अपडेट्स, अँड्रॉइड रिलीझ आणि अधूनमधून येणारे हार्डवेअर उत्पादने लाँच करण्यासाठी याचा वापर केला आहे. यावर्षी, अँड्रॉइड 16बद्दल अधिक अपडेट्स तसेच गुगलच्या विविध ॲप्स, प्लॅटफॉर्म आणि सेवांमध्ये अधिक एआय वैशिष्ट्ये येण्याची अपेक्षा आहे.
पिक्सेल फोल्ड, गुगल असिस्टंट, पिक्सेल टॅब्लेट, अँड्रॉइड वेअर, गुगल फोटोज आणि इतर अनेक उत्पादने आणि सेवांसाठी गुगल आय/ओचा वापर केला जात होता. यावर्षी कोणतेही नवीन डिव्हाइस लाँच होतील की नाही हे अजून स्पष्ट झालेले नाही, परंतु गुगलच्या सेवांच्या इकोसिस्टममध्ये राहणाऱ्या प्रत्येकासाठी किमान काहीतरी रोमांचक या इव्हेंटमध्ये असण्याची अपेक्षा
आहे. युझर्स आता या कार्यक्रमात सहभागासाठी नोंदणी करू शकतात. सर्व कीनोट्स, सत्रे आणि इतर सामग्री गुगल डेव्हलपर्स यूट्यूब चॅनेलवरदेखील दिसेल. मुख्य कीनोट 20 मे रोजी होईल आणि गुगल यूट्यूब चॅनेलवर लाईव्ह स्ट्रीम केले जाईल. या वर्षीचे कीनोट 2024 च्या इव्हेंटइतके गुगल एआय जेमिनीवर केंद्रित नसेल, अशी अपेक्षा आहे.
गेल्या वर्षीच्या गुगल आय/ओमध्ये वेअर ओएस 5, अँड्रॉइड 15चा दुसरा बीटा, गुगल सर्चमध्ये एआय-संचालित ओव्हरव्ह्यू , गुगल फोटोजमध्ये सर्च अपग्रेड्स, अँड्रॉइड टीव्ही 14 आणि बरेच एआय डेमो समाविष्ट होते. त्यानंतर लगेचच अमेरिकेत सर्चमधील एआय ओव्हरव्ह्यूज आणले गेले. मात्र, त्यातून अनेक गंमतीशीर प्रकार घडले. हे गुगल एआय ओव्हरव्ह्यूज युझर्सना सांगत होते की, पेट्रोलचा वापर मसालेदार स्पॅगेटी डिश बनवण्यासाठी केला जाऊ शकतो, सरासरी व्यक्ती दररोज रात्री 15-18 कीटक खातो आणि गोंद हा पिझ्झा टॉपिंग आहे. हे वैशिष्ट्य आजही तथ्यांमध्ये गोंधळ घालत आहे आणि काही युझर्स आता एआय ओव्हरव्ह्यूज ब्लॉक करण्यासाठी सर्च क्वेरीजमध्ये “शाप” ही टर्म वापरू लागले आहेत.
