श्री साईबाबा संस्थान विश्वस्थव्यवस्था, शिर्डीच्या वतीने प्रकाशित करण्यात येणारी “श्री साईबाबा दैनंदिनी २०२१” सर्व साईभक्तांकरीता प्रति नग रुपये २५/- या नाममात्र सवलतीच्या दरात उपलब्ध करुन देण्याचा निर्णय संस्थानच्या तदर्थ समितीने घेतला असल्याची माहिती संस्थानचे मुख्य कार्यकारी अधिकारी कान्हूराज बगाटे यांनी दिली.
संस्थान व्यवस्थापनामार्फत दरवर्षी श्री साईबाबा दैनंदिनी व दिनदर्शिका प्रकाशित करण्यात येतात. या विविध प्रकारच्या दैनंदिनी व दिनदर्शिका साईभक्तांना सशुल्क उपलब्ध करुन दिल्या जातात. त्यानुसार यावर्षी सन २०२१ची वैशिष्टयपूर्ण श्री साईबाबा दैनंदिनी चार भाषेत (मराठी, हिंदी, इंग्रजी व तेलगू) स्वतंत्र्यरित्या प्रकाशित करण्यात आली आहे. या दैनंदिनीत श्री साईबाबा समाधी मंदिर व मंदिर परिसरातील विविध मंदिरे आणि महत्त्वाच्या स्थानांची सविस्तर माहिती नमूद करण्यात आली आहे.
प्रत्येक स्थानाच्या माहितीसमवेत QR CODE देण्यात आले आहेत. हे QR CODE SCAN केले असता, संबंधित स्थानांची अथवा विभागाची माहिती विविध छायाचित्रांसह दृकश्राव्य पध्दतीने (Video Clip व्दारे) उपलब्ध होते. याव्यतिरिक्त संस्थानमार्फत साजरे होणारे सर्व उत्सव, धार्मिक व इतर कार्यक्रमांची सविस्तर माहिती, संस्थान प्रकाशित पुस्तके / फोटो, ऑनलाईन देणगी, निवासस्थाने व दर्शन आणि आरती नोंदणी करण्याबाबत महत्त्वपूर्ण माहितीचा समावेश करण्यात आला आहे.
अशाप्रकारे वैशिष्टयपूर्ण असलेली “श्री साईबाबा दैनंदिनी”ची सर्व साईभक्तांना २५/- रुपये प्रति नग या नाममात्र सवलतीच्या दरात विक्री करण्यात येणार असून ही दैनंदिनी समाधी मंदिराशेजारील साई कॉम्प्लेक्स व प्रवेशव्दार क्रमांक ०४ येथील पुस्तक विक्री काऊंटर, हैद्राबाद येथील माहिती केंद्र व संस्थानच्या www.sai.org.in या अधिकृत संकेतस्थळावर ऑनलाईन विक्रीकरीता उपलब्ध असणार आहे. सर्व साईभक्तांनी या सवलतीच्या दराचा लाभ घ्यावा असे आवाहनही बगाटे यांनी केले.
