केंद्रीय निवडणूक आयोगाने आगामी विधानसभा निवडणुकीत प्रकाश आंबेडकर यांच्या वंचित बहुजन आघाडीला वंचित न ठेवता संपूर्ण निवडणुकीसाठी गॅस सिलेंडर, हे चिन्ह दिले आहे.
लोकसभा निवडणुकीत मात्र निवडणूक आयोगाने एकाच निवडणुकीत तीन वेगवेगळी चिन्हे वंचित बहुजन आघाडीला दिली होती. १९ एप्रिलला झालेल्या लोकसभा निवडणुकीच्या पहिल्या टप्प्यातील मतदानासाठी वंचितला लोकसभेच्या पाचपैकी चार मतदारसंघांत तीन वेगवेगळी निवडणूक चिन्हे मिळाली होती. रामटेक आणि गडचिरोली-चिमूर लोकसभा मतदारसंघात गॅस सिलिंडर, भंडारा लोकसभा मतदारसंघात उसाची मोळी घेतलेला शेतकरी तर चंद्रपूर लोकसभा मतदारसंघात रोड रोलर या निवडणूक चिन्हावर वंचितचे उमेदवार लढले होते.
वंचितचे प्रमुख प्रकाश आंबेडकर यांनी नवी दिल्लीत निवडणूक आयुक्तांची भेट घेऊन लोकसभा निवडणुकीसाठी गॅस सिलिंडर, शिट्टी किंवा रोड रोलर यापैकी एक निवडणूक चिन्ह मिळावे, अशी मागणी केली होती. मात्र, निवडणूक आयोगाने ‘वंचित’ला एकच निवडणूक चिन्ह दिले नव्हते. मात्र, विधानसभा निवडणुकीसाठी आयोगाने वंचितला गॅस सिलेंडर, हे चिन्ह दिले आहे.
