विधानसभेचे विरोधी पक्षनेते देवेंद्र फडणवीस यांनी फोडलेले फटाके नवाब मलिक यांना भिजलेले वाटले. पण, त्यांचा चेहरा मात्र घामाने भिजलेला होता. चेहऱ्यावरचा थाट, मेकअप उतरलेला होता. नवाब मलिक यांची पत्रकार परिषद म्हणजे.. कुबूल.. कुबूल.. कुबूल.. असा कबुलीनामाच होता, अशी टीका भारतीय जनता पार्टीचे आमदार आशिष शेलार यांनी आज एका पत्रकार परिषदेत केला.
राज्यातल्या ठाकरे सरकारचे कपडे कसे अंडरवर्ल्डमध्ये भिजलेले आहेत हे फडणवीस यांनी उघड केले आहेत. त्यामुळे मुख्यमंत्र्यांनी याची दखल घेऊन पोलीसांमार्फत चौकशी करावी अशी मागणीही त्यांनी केली.
देवेंद्र फडणवीस यांनी एकूण चार आरोप केले. त्यापैकी पहिला सरदार शाहवल्ली हा मुंबईच्या 93च्या बाँम्बस्फोटमधील शिक्षापात्र आरोपी असून त्याच्याशी नवाब मलिक यांचे आर्थिक व्यवहार झाले. दुसरा, मोहमद सलीम पटेल हा दाऊदची बहिण हसीना पारकरचा ड्रायव्हर व फ्रंट मँन, पाँवर आँफ एटर्नी होल्डर आणि अटक झालेला आरोपी यांच्यामार्फत व्यवहार करुन फायदा करुन दिला. तिसरा आरोप.. मुंबई बाँम्बस्फोटातील आरोपीं, जे टाडाखाली अटक झाले त्या आरोपींची जी जमीन सील होणार होती, सरकारजमा होईल म्हणून त्यांना मदत करण्यासाठी त्यांची जमीन स्वतःकडे वळवली, घेतल्याचे दाखवले. आणि चौथा आरोप.. जमीन कवडीमोल किंमतीने घेऊन त्यांचा फायदा केला. यातील तीन आरोप नवाब मलिक यांनी कबूल केले. हसीना पारकर या विषयात बोलण्याची हिम्मत नसल्याने त्याबद्दल मौन राखून त्यांनी तो आरोप कबूल केला, असेही शेलार म्हणाले.
नवाब मलिक म्हणतात की, त्या जागेत आमची दुकाने होती. त्यासह संपूर्ण कंम्पाऊंडची मालकी मिळवली. तेही 30 लाख ठरवून.. 20 लाख एवढ्या कवडीमोल किमंतीत मालकी मिळवली. मुंबईतील हे कसले “नवाबी भाडेकरू”?, ज्यांना सरकारी दरापेक्षा कमी दरात जागेची मालकी मालकाने दिली. मुंबईतील भाडेकरुंचा प्रश्न एवढ्या सहजपणे सुटत असेल तर मग मुख्यमंत्री उद्धव ठाकरे यांनी जीआर काढून वर्षानुवर्षे न्यायालयात लढणाऱ्या मुंबईतील भाडेकरुंना हाच नियम लावावा, अशी उपरोधिक मागणीही त्यांनी केली. मुंबईतील खाजगी जागेवरील झोपडपट्टीची मालकी देण्यासाठी आजसुद्धा सरकार रेडीरेकनरच्या 25% रक्कम जमा करुन घेते. मग नवाब मलिक यांना एवढी जागा कशी काय हस्तांतरीत करुन मिळाली? या व्यवहारात सरदार शाहवल्ली याचे वडील वॉचमन असल्याने त्यांनी आपले नाव जागेला चढवले म्हणून त्याला पैसै दिले, हा नवा नवाबी धंदा सांगताय का? नवाबी दर, नवाबी धंदे, नवाबी व्यवहार, नवाबी भाडेकरू, नवाबी मालक असे बोलत शेलार यांनी मलिक यांच्या विधानांची खिल्ली उडवली.
