पुरेसा लससाठा नसल्याने उद्या दिनांक २९ एप्रिल २०२१ रोजी मुंबईतल्या ७३पैकी ४० खासगी लसीकरण केंद्रे बंद राहणार असून उर्वरित ३३ खासगी लसीकरण केंद्रांवरही दुसऱ्या मात्रेसाठी मर्यादित साठाच शिल्लक ठेवण्यात आल्याचे समजते.
आज रात्रीपर्यंत लससाठा उपलब्ध झाला तर उद्या शासकीय व महानगरपालिका लसीकरण केंद्रे सुरू राहणार आहेत. त्यामुळे दुसरी मात्रा घेऊ इच्छिणाऱ्यांनीच उद्या दिनांक २९ एप्रिल २०२१ रोजी लसीकरणासाठी यावे, असे आवाहन मुंबई महापालिकेने केले आहे.
कोविड प्रतिबंध लसीचा मुंबईत उपलब्ध असलेला साठा आज (दिनांक २८ एप्रिल २०२१) जवळपास संपुष्टात आला आहे. या कारणाने उद्या गुरुवार, दिनांक २९ एप्रिल २०२१ रोजी मुंबईतील ७३ पैकी ४० खासगी लसीकरण केंद्रांवर लसीकरण होणार नाही. तर उर्वरित ३३ खासगी लसीकरण केंद्रांवरही मर्यादीत लससाठी उपलब्ध आहे. या कारणाने तेथे दुसऱ्या मात्रेसाठी (डोस) येणाऱ्या नागरिकांना प्राधान्याने व लससाठा असेपर्यंतच लस देण्यात येणार आहे.
दरम्यान, आज (दिनांक २८ एप्रिल २०२१) रात्री उशिरापर्यंत काही प्रमाणात लससाठा उपलब्ध होण्याची शक्यता आहे. हा साठा प्राप्त झाल्यास उद्या गुरुवार दिनांक २९ एप्रिल २०२१ रोजी मुंबईतील शासकीय तसेच महानगरपालिका रुग्णालयातील केंद्रांवर लसीकरण सुरू राहणार आहे.
लससाठ्याच्या उपलब्धतेची ही वस्तुस्थिती पाहता, उद्या गुरुवार, दिनांक २९ एप्रिल २०२१ रोजी दुसरी मात्रा घेण्यास पात्र असणाऱ्यांनीच लसीकरणासाठी यावे, असे आवाहन मुंबई महापालिकेने केले आहे. लससाठ्याचा ओघ वाढल्यानंतर लसीकरण मोहीम पूर्ववत सुरू होईल.
मुंबई महापालिका कार्यक्षेत्रात कोविड-१९ प्रतिबंध लसीकरण मोहिमेतंर्गत महापालिका, शासन यांच्यातर्फे ६३ लसीकरण केंद्रे तर खासगी रुग्णालयात ७३ अशी एकूण १३६ लसीकरण केंद्रे कार्यान्वित करण्यात आलेली आहेत. मात्र, कोविड प्रतिबंध लसीचा साठा मर्यादित स्वरुपात प्राप्त होत असल्याने अधूनमधून काही केंद्रांवर लसीकरण तात्पुरते थांबवावे लागते. त्यातही दुसरी मात्रा (डोस) घेणाऱ्यांना प्राधान्य देणे क्रमप्राप्त असल्याने लसींचा प्राप्त होणारा साठा लक्षात घेऊन दररोज लसीकरण मोहिमेचे नियोजन केले जात आहे.
मुंबईतील लसीकरण मोहीम अखंडितपणे सुरु ठेवता यावी, त्यासाठी आवश्यक लससाठा उपलब्ध व्हावा, याकरीता मुंबई महापालिका प्रशासन केंद्र सरकारकडे सातत्याने पाठपुरावा करत आहे. या अनुषंगाने, आज (दिनांक २८ एप्रिल २०२१) रात्री उशिरापर्यंत सरकारकडून काही प्रमाणात लससाठा उपलब्ध होण्याची शक्यता आहे. आज रात्री उशिरापर्यंत लस साठा उपलब्ध झाला तर उद्या (दिनांक २९ एप्रिल २०२१) सकाळी लससाठा वितरण करण्यात येईल. त्यामुळे महापालिका व शासकीय लसीकरण केंद्रावर लसीकरण सुरू करण्यास उशीर होऊ शकतो, असेही पालिकेने स्पष्ट केले आहे.
मुंबई महापालिकेला दिनांक २५ एप्रिल २०२१पर्यंत एकूण २४ लाख ५८ हजार ६०० इतक्या लसी उपलब्ध झाल्या. त्यापैकी, २४ लाख १० हजार ८६० लस उपयोगात आल्या. म्हणजेच ४७ हजार ७४० इतका लस साठा आज (दिनांक २८ एप्रिल २०२१ रोजी दुपारी २ वाजेपर्यंत) लसीकरणानंतर संबधित केंद्रावर शिल्लक होता. लसीकरणाचा वेग लक्षात घेता हा लससाठा आजच पूर्णतः उपयोगात येण्याची शक्यता आहे, असेही पालिकेने म्हटले आहे.
