राष्ट्रवादी काँग्रेसचे अध्यक्ष शरद पवार यांनी आज संध्याकाळी अचानक मुख्यमंत्री एकनाथ शिंदे यांच्या वर्षा, या शासकीय निवासस्थानी जाऊन भेट घेतल्याने टीव्हीवरील न्यूज चॅनल्सच्या वार्ताहरांमध्ये एकच खळबळ उडाली. अखेर मुख्यमंत्री शिंदे यांनी स्वतःच ही सदिच्छा भेट असल्याचे जाहीर केल्यानंतर न्यूज चॅनल्सच्या बातमीदारांची तोंडे पाहण्यासारखी झाली.
आज संध्याकाळी सात वाजण्याच्या सुमारास गेट वे ऑफ इंडिया येथील ३५०व्या शिवराज्याभिषेक सोहोळ्याच्या कार्यक्रमातून निघालेले मुख्यमंत्री तडक वर्षा, या निवासस्थानी पोहोचले. त्यांच्यापाठोपाठ पवार वर्षावर पोहोचले. दोन्ही नेत्यांनी छायाचित्रकारांसमोर फोटोसाठी पोझही दिल्या. नंतर अर्ध्या तासाच्या चर्चेनंतर पवार निघून घेले. पवार वर्षावर पोहोचल्याचे कळताच टीव्ही चॅनलवरच्या कपोलकल्पित चर्चा आणि आडाख्यांना ऊत आला. त्या अर्ध्या तासात अनेक कथित राजकीय विश्लेषकांनी मोठमोठी उड्डाणे केली. त्यातच पवार वार्ताहरांशी न बोलताच निघून गेल्याने या चर्चेला जरा धारच चढली होती. परंतु तितक्यात मुख्यमंत्री शिंदे यांनी यावर भाष्य केले. पवार यांची ही भेट सदिच्छा भेट होती. यात कोणतीही राजकीय चर्चा झाली नाही. पवार मराठा मंदिर संस्थेचे अध्यक्ष आहेत. या संस्थेच्या अमृतमहोत्सवी कार्यक्रमाचे निमंत्रण त्यांनी आपल्याला दिले, असे शिंदे यांनी स्पष्ट केले. त्यानंतर एक्साईट झालेले वृत्तनिवेदक भानावर आले. नंतर या बातमीलाही फारसे स्थान मिळाले नाही.
