केंद्र सरकारच्या ऊर्जा मंत्रालयाच्या अखत्यारितील ऊर्जा दक्षता ब्युरोद्वारे ऊर्जा व पर्यावरण विषयाच्या अनुषंगाने राज्यस्तरीय चित्रकला स्पर्धेचे आयोजन नुकतेच करण्यात आले होते. या स्पर्धेमध्ये बृहन्मुंबई महानगरपालिकेच्या कुलाबा महापालिका उच्च प्राथमिक शाळेतील सातवीची विद्यार्थिनी रिया बप्पी साहिस हिला ७,५००/- रूपयांचे विशेष उत्तेजनार्थ पारितोषिक देऊन नुकतेच गौरविण्यात आले.
चर्चगेट परिसरातील पाटकर सभागृहात नुकत्याच आयोजित झालेल्या एका कार्यक्रमादरम्यान केंद्र सरकारच्या संबंधित खात्याचे ज्येष्ठ अधिकारी सुब्रता मंडल यांच्या हस्ते रोख पारितोषिक व प्रमाणपत्र देऊन रिया साहिस हिच्या कलेचा गौरव करण्यात आला आहे. याप्रसंगी जी. जी. वाघमारे, कला क्षेत्रातील ज्येष्ठ प्राध्यापक नितीन केणी, पूनम परुळेकर, मीरा सावंत यांच्यासह राज्यभरातून आलेले पुरस्कारविजेते विद्यार्थी व संबंधित शिक्षक उपस्थित होते.
राज्यभरातून १ हजार ३००पेक्षा अधिक विद्यार्थ्यांनी या स्पर्धेत भाग घेतला होता. रिया हिने १८ X २४ इंच आकाराच्या ‘हाफ इम्पिरियल’ प्रकारच्या कागदावर ‘ऑईल पेस्टल’ प्रकारचे रंग वापरुन हे अर्थवाही चित्र काढले होते, असे तिच्या कला शिक्षिका मीरा बोडके यांनी सांगितले.
बृहन्मुंबई महानगरपालिकेच्या १ हजार १००पेक्षा अधिक शाळांपैकी ए विभागातील ‘कुलाबा उच्च प्राथमिक इंग्रजी शाळा’ ही एक शाळा आहे. या शाळेत पहिली ते आठवीचे वर्ग असून यामध्ये १ हजार ५६३ विद्यार्थी सध्या शिक्षण घेत आहेत. या शाळेत ४० शिक्षक असून शिक्षकेतर कर्मचाऱ्यांची संख्या ५ आहे. या शाळेमध्ये नियमित शिक्षणासोबतच कलागुण विकास केंद्र, संगणक वर्ग, व्हर्च्युअल क्लासरुम, संगीत वर्ग, विज्ञान प्रयोगशाळा, क्रीडा वर्ग आदी सोईसुविधा आहेत, अशीही माहिती शाळेकडून देण्यात आली.
महानगरपालिकेचे शिक्षण अधिकारी राजेश कंकाळ, शिक्षण अधिकारी राजू तडवी, कुलाबा महानगरपालिका उच्च प्राथमिक इंग्रजी शाळेचे मुख्याध्यापक आरिफ शेख, विभाग निरिक्षिका सुजाता हुलवान आणि शाळेतील सर्व शिक्षक व कर्मचाऱ्यांनी रिया साहिसला शुभेच्छा दिल्या आहेत.
