स्वातंत्र्याच्या अमृत महोत्सवा अंतर्गत दक्षिण मध्य सांस्कृतिक केंद्र, नागपूरच्या वतीने येत्या रविवारी, 13 फेब्रुवारीला पहाटे 6.30 वाजता ‘ब्रह्मनाद’, या संगीत पहाट मैफलीचे आयोजन करण्यात आले आहे.
दक्षिण मध्य क्षेत्र सांस्कृतिक केंद्राच्या परिसरातच हा कार्यक्रम होणार आहे. नागपूरच्या प्रसिद्ध शास्त्रीय संगीत गायिका डॉ. साधना शिलेदार यावेळी शास्त्रीय गायन सादर करतील. कला रसिकांना कार्यक्रमस्थळी प्रत्यक्ष उपस्थित राहून या कार्यक्रमाचा आनंद घेता येईल. त्याचप्रमाणे https://www.facebook.com/SCZCC/ या फेसबुक दुव्याच्या माध्यमातूनही रसिकांना या कार्यक्रमाचा आस्वाद घेता येईल.
डॉ. साधना शिलेदार यांनी त्यांचे वडील डॉ. विवेक गोखले, पंडित मनोहरराव कासलीकर, पंडित चंद्रशेखर रेळे आणि आरती अंकलीकर-टीकेकर यांच्याकडून संगीताचे शिक्षण घेतले आहे. डॉ. साधना शिलेदार या आकाशवाणीच्या ब श्रेणी शास्त्रीय संगीत कलाकार आहेत.
डॉ. साधना शिलेदार यांना अनेक पुरस्कारांनी सन्मानित करण्यात आले आहे. तसेच त्यांनी विविध समारंभ आणि कार्यक्रमांमध्ये शास्त्रीय गायन सादर केले आहे. ‘ब्रह्मनाद’ या पहाट संगीत मैफलीत त्यांना राम ढोक तबला तर श्रीकांत पिसे हार्मोनियमची साथसंगत करतील.
या कार्यक्रमासाठी प्रति व्यक्ती 50 रुपये देणगी शुल्क ठेवण्यात आले आहे. या कार्यक्रमाच्या प्रवेशिका कार्यक्रमाच्या दिवशी कार्यक्रमस्थळी उपलब्ध असतील. कोविड-19च्या पार्श्वभूमीवर, प्रत्येक कला रसिकाने मास्क परिधान करून कार्यक्रमस्थळी प्रवेश करणे अनिवार्य आहे. यादृष्टीने सहकार्य करून रसिकांनी या पहाट मैफलीचा आनंद घ्यावा, असे आवाहन दक्षिण मध्य सांस्कृतिक केंद्राच्या वतीने करण्यात आले आहे.
