कॉर्डेलिया क्रूझवरील एकूण १ हजार ८२७ प्रवाशांपैकी एकूण १३९ जण कोविडबाधित असल्याचे अहवाल काल रात्री (५ जानेवारी २०२२) मुंबई महापालिकेला प्राप्त झाले आहेत.
कॉर्डेलिया क्रूझ मंगळवारी सायंकाळी ग्रीन गेट येथे आल्यानंतर त्यावरील ६० बाधित रुग्णांना भायखळा येथील रिचर्डसन आणि क्रुडास जम्बो कोविड केंद्र, सेंट जॉर्ज शासकीय रुग्णालय आणि इतर विविध हॉटेल्समध्ये यापूर्वीच दाखल करण्यात आले आहे.
त्यानंतर, जहाजावरील एकूण १ हजार ८२७ प्रवाशांची कोविड तपासणी करून, त्यांच्या स्वॅबचे नमुने दोन वैद्यकीय प्रयोगशाळेमार्फत घेण्यात आले होते. यासाठी महानगरपालिकेच्या ए विभागाचे वैद्यकीय आरोग्य अधिकारी व त्यांचे सहकारी, निमवैद्यकीय कर्मचारी, तंत्रज्ञ तसेच परिरक्षण खात्यातील अभियंते, अधिकारी, कर्मचारी, कामगार अशी संपूर्ण यंत्रणा कार्यरत होती. प्रवाशांची तपासणी करण्याची कार्यवाही पहाटे पाच वाजेपर्यंत सुरू होती.
महानगरपालिका आयुक्त डॉ. इकबाल सिंह चहल, अतिरिक्त महानगरपालिका आयुक्त (पश्चिम उपनगरे) सुरेश काकाणी यांच्या मार्गदर्शनाखाली, सहआयुक्त (परिमंडळ १) रणजित ढाकणे, ए विभागाचे सहायक आयुक्त (प्रभारी) शिवदास गुरव व त्यांचे सहकारी, वैद्यकीय आरोग्य अधिकारी डॉ. प्राजक्ता आंबेरकर यांनी आवश्यक ते सर्व नियोजन व व्यवस्था केली होती.
बाधित रुग्णांच्या वाहतुकीसाठी १७ आसनी क्षमतेच्या पाच रुग्णवाहिका तैनात करण्यात आल्या आहेत. ज्यांचे अहवाल नकारात्मक आले आहेत, अशा सर्व रुग्णांना सात दिवस गृह अलगीकरण सक्तीचे केले आहे. कायदा व सुव्यवस्थेच्या दृष्टिकोनातून पुरेसा पोलीस बंदोबस्त पुरविण्यात आलेला आहे.
