बृहन्मुंबई महानगरपालिकेच्या आस्थापनेवरील कार्यकारी सहायक (पूर्वीचे पदनाम लिपिक) या निम्न संवर्गाच्या रिक्त जागांसाठी आज ऑनलाईन परीक्षा सुरळीत पार पडली. दोन हजारांहून जास्त जणांनी ही परीक्षा दिली.
बृहन्मुंबई महानगरपालिकेच्या आस्थापनेवरील कार्यकारी सहायक या संवर्गातील १ हजार १७८ पदांची परीक्षा आज झाली. महानगरपालिकेत कार्यरत निम्न संवर्गातील कर्मचाऱ्यांमधून ही पदे भरण्यासाठी आज दुपारी ऑनलाईन परीक्षा आयोजित करण्यात आली होती. वरळी, पवई, कांदिवली, बेलापूर व नेरूळ येथील केंद्रांवर ही परीक्षा घेण्यात आली.
एकूण २ हजार १७३ नोंदणीकृत उमेदवारांपैकी २ हजार ०५३ उमेदवार या परीक्षा केंद्रावर उपस्थित होते. तर, १२० उमेदवार अनुपस्थित होते. एकूण २ हजार १७३ उमेदवारांमध्ये दिव्यांग १५० उमेदवारांचा समावेश होता. त्यापैकी १४३ उमेदवार उपस्थित होते. तर, ७ उमेदवार अनुपस्थित होते. सर्व केंद्रावर परीक्षा सुरळीतपणे पार पडल्याचे पालिका प्रशासनाच्या वतीने कळविण्यात आले.
