मुंबई महानगरपालिका, उद्यान अधीक्षक जितेंद्र परदेशी यांच्या मार्गदर्शनाखाली परिमंडळ ५ व ६ यांच्या विद्यमाने नागरिकांसाठी आज, १५ आणि उद्या १६ फेब्रुवारीला मुलुंड पूर्व येथील डॉ. चिंतामणराव देशमुख उद्यान येथे विनामूल्य पुष्प प्रदर्शन आयोजित करण्यात आले आहे. स्टारफिश, ऑक्टोपस आदी जलचरांची प्रतिकृती या प्रदर्शनात पाहायला मिळणार आहे.
हे प्रदर्शन सकाळी ८.०० ते सायंकाळी ८.०० यादरम्यान भेट देण्यासाठी खुले राहील. यात विविध रोपांची, औषधी वनस्पती, सुगंधी वनस्पती, हंगामी फुलझाडे, फळभाज्या, पालेभाजी वनस्पती यांची वैशिष्ट्यपूर्ण मांडणी करण्यात आलेली आहे. या पुष्प् प्रदर्शनाचे वैशिष्ट्य म्हणजे यामध्ये समुद्रवर्गीय तसेच जलचर प्राणी ही संकल्पना दाखविण्यात आली आहे. जलप्रदूषणामुळे / मानवी हस्तक्षेपामुळे समुद्रातील परिसंस्थेवर होणारे दुष्परिणाम दाखवतानाच नागरिकांमध्ये जलचर प्राणीसंवर्धनाबाबत जागरूकता निर्माण करणे हा या प्रदर्शनामागचा हेतू आहे.
नागरिकांनी, विशेषतः निसर्गप्रेमींनी या प्रदर्शनास मोठ्या संख्येने भेट देऊन निसर्गाच्या अद्भुत कलाकृतीचा आनंद घ्यावा, असे आवाहन पालिकेच्या वतीने करण्यात आले आहे.
