१७ नोव्हेंबर हा शिवसेनाप्रमुख बाळासाहेब ठाकरे यांचा स्मृतीदिन. हजारो शिवसैनिक यानिमित्त मुंबईतल्या शिवतीर्थावरील बाळासाहेबांच्या स्मृतीस्थळावर येऊन त्यांना अभिवादन करतात. येत्या बुधवारी म्हणजेच १७ नोव्हेंबरला बाळासाहेबांचा नववा स्मृतीदिन आहे. हजारो शिवसैनिक, बाळासाहेबांचे अनुयायी यानिमित्ताने स्मृतीस्थळावर येणार
आहेत. शिवसैनिकांची तसेच बाळासाहेबांच्या चाहत्यांची गर्दी लक्षात घेऊन मुंबई महापालिकेतर्फे स्मृतीस्थळावर चोख व्यवस्था दरवर्षी केली जाते. यंदाही तशी तयारी सध्या सुरू आहे. स्मृतीस्थळ तसेच आसपासचा परिसर सुशोभित करण्याचे कामही चालू आहे. त्याचे हे बोलके क्षण..
मुंबई महापालिकेच्या मेंटेनन्स, इलेक्ट्रिक, इंजिनिअरिंग तसेच गार्डन डिपार्टमेंटचे साधारण ३५ ते ४० कर्मचारी सध्या ही सर्व तयारी करत आहेत. स्मृतीस्थळावर मंडप उभारला जात आहे. रंगरंगोटी केली जात आहे. ग्रील्स दुरूस्त होत आहेत. सर्वात महत्त्वाचा भाग आहे, फुलझाडांच्या रचनेचा. फुलझाडे तसेच रंगीत पानांची झाडे विविध आकारात रचून परिसर सुशोभित करण्यात येत आहे.
यात लाल-पिवळ्या रंगांची फुले असलेल्या पॉईंटेशिया, फिकट पिवळ्या रंगांच्या शेवंती, रंगीबेरंगी जेरबेरा, केशरी रंगाचा गोंडा आदी झाडांचा वापर केला जात आहे. लॉनवर सर्वत्र हिरव्या रंगाची चादर पसरलेली दिसेल याची खबरदारी घेताना हवे त्या प्रमाणात गवत लावले जात आहे.
आठ नोव्हेंबरपासून सुरू असलेली ही तयारी आता अंतीम टप्प्यात आली आहे. उद्या रात्रीपर्यंत सारे काम पूर्ण होईल असा अंदाज असून मंगळवारी वरिष्ठ अधिकारी घटनास्थळी जाऊन साऱ्या व्यवस्थेचा आढावा घेणार असल्याचे समजते.
