19 मार्च रोजी प्रदर्शित झालेल्या ‘धुरंदर 2 : द रिव्हेंज’ने बॉलीवूडच्या इतिहासात सुवर्णाक्षरांनी नाव कोरले. पहिल्याच दिवशी तब्बल ₹ 102.55 कोटी नेट कलेक्शन आणि जागतिक पातळीवर ₹ 200 कोटींचा आकडा पार करत हा चित्रपट बॉलीवूडचा सर्वकालीन सर्वात मोठा ओपनर ठरला. शाहरुख खानच्या ‘जवान’चा (₹ 75 कोटी) विक्रम मोडत, रणवीर सिंगने आपल्या कारकिर्दीतील सर्वात मोठी कमाई नोंदवली. हा फक्त एक चित्रपट नाही, हे Gen-Z च्या थिएटर प्रेमाचं पुनरागमन आहे!
आदित्य धर दिग्दर्शित या स्पाय-अॅक्शन थ्रिलरमध्ये रणवीर सिंगने ‘जसकिरात सिंग रंगी’ उर्फ ‘हमजा अली मझारी’ ही गुप्तहेराची भूमिका साकारली आहे. पाकिस्तानातील कराची गुन्हेगारीविश्वात खोलवर शिरलेला हा एजंट 26/11च्या हल्ल्याचा बदला घेत आणखी मोठ्या धोक्यांशी सामना करतो. आर. माधवन, अर्जुन रामपाल, संजय दत्त, सारा अर्जुन आणि राकेश बेदी हेदेखील या सिक्वेलमध्ये परतले आहेत. कथेची तीव्रता आणि भावनिक खोली यामुळेच प्रेक्षक पुन्हा एकदा OTT सोडून थेट थिएटरकडे धावत आहेत.
चित्रपटाचे तांत्रिक पैलू विशेष उल्लेखनीय आहेत. शशांत सचदेव यांचे बॅकग्राउंड स्कोअर या चित्रपटाचा आत्मा आहे. ट्रेड विश्लेषकांनी चित्रपटाच्या नॅरेटिव्ह इंटेन्सिटीचं आणि मुख्य प्रवाहातील व्यावसायिक अपिलाचं भरभरून कौतुक केलं. तज्ज्ञांचा अंदाज आहे की, हा चित्रपट 1,000 कोटी नेट कलेक्शनच्या दिशेने वाटचाल करत आहे. चित्रपटाचं बजेट ₹ 250-280 कोटी इतकं प्रचंड होतं, पण फक्त प्रीव्ह्यू शोजनेच ₹ 43 कोटींचं कमाई केली, जो भारतीय चित्रपट इतिहासातील सर्वोच्च प्रीव्ह्यू कलेक्शनचा विक्रम आहे.
धुरंदर-2 हा बॉलीवूडचा पहिला चित्रपट ठरला ज्याने ऍडव्हान्स बुकिंगमध्ये ₹ 200 कोटी ग्रॉस ओलांडले, हा विक्रम आधी फक्त पुष्पा-2, RRR, लिओ आणि बाहुबली-2 या चित्रपटांच्या नावावर होता. मुंबई, पुणे आणि अहमदाबादमध्ये तर मध्यरात्रीचे आणि पहाटेचे स्पेशल शोज ठेवण्यात आले. Gen-Z प्रेक्षकांनी ‘बुकमायशो’वर एका तासात इतिहासातील सर्वात वेगवान तिकीट विक्रीचा उच्चांक मोडला.
दुसऱ्या दिवशी (शुक्रवारी) कामकाजाचा दिवस असल्याने कलेक्शन काहीसं कमी होऊन ₹ 80.72 कोटी नोंदलं गेलं, मात्र दोन दिवसांत एकूण ₹ 226 कोटींचा टप्पा ओलांडत चित्रपट ‘200 कोटी क्लब’मध्ये दाखल झाला. पुष्पा-2च्या हिंदी बेल्टमधील दुसऱ्या दिवसाचा (₹ 56.9 कोटी) विक्रमही धुरंदर-2ने मोडला. ईद (21 मार्च) आणि रविवारच्या सुट्टीनिमित्त देशभरातील सर्वच थिएटर्स पूर्ण हाऊसफुल्ल होण्याचा अंदाज आहे. त्याचे आकडे आता येतीलच. बॉलीवूडचा हा ‘सिनेमॅटिक युनिव्हर्स’ आता खऱ्या अर्थाने ‘मार्व्हल’ला टक्कर देण्यासाठी सज्ज झाला आहे!
