बॉलीवूडमध्ये “सुपरस्टार” हा शब्द हल्ली खूप सहजपणाने वापरला जातो. पण जेव्हा खुद्द रजनीकांत एखाद्या चित्रपटाला “मस्ट वॉच” म्हणतात आणि त्याला “बॉक्स ऑफिस का बाप” असे संबोधतात, तेव्हा समजायचे की, काहीतरी असाधारण घडले आहे. रजनीकांत यांनी नुकतीच सोशल मीडियावर पोस्ट करत लिहिले- “काय फिल्म आहे… धुरंधर २! आदित्य धर… बॉक्स ऑफिस का बाप!! रणवीर आणि सर्व कलाकार तसेच क्रू मेबर्स यांचे अभिनंदन. प्रत्येक भारतीयाने पाहायलाच हवी अशी मस्ट वॉच फिल्म. जय हिंद”. दक्षिण भारतातील या सुपरस्टारची दखल घेणे, बॉलीवूडसाठी खूप महत्त्वाचे ठरते. दिग्दर्शक आदित्य धर यांनी रजनींच्या शब्दांनंतर प्रतिक्रिया देताना सांगितले की ते “शब्दांच्या पलीकडे ग्रेटफुल” आहेत.
पाच दिवसांत काय घडले?
आकडे बघितले की डोळेच फिरतात. रिलीजच्या चौथ्या दिवशी, रविवारी धुरंधर: दी रिव्हेंज (हिंदी)ने ₹ १०१ कोटी नेट कमवले. हिंदी चित्रपटाच्या इतिहासात एकाच दिवशी तीन आकडी गल्ला जमवणारा हा पहिलाच चित्रपट ठरला. पाचव्या दिवशी, सोमवारी या चित्रपटाने पठाणला मागे टाकत ₹ ६० कोटी नेट कमवले, जो हिंदी चित्रपटाचा सर्वकालीन सोमवार विक्रम आहे. जागतिक स्तरावर पहिल्या विस्तारित वीकेंडमध्ये ₹ ६७८ कोटींचा आकडा ओलांडला. परदेशात अमेरिकी २१.२५ दशलक्ष डॉलर्स म्हणजे ₹ २०० कोटी, केवळ चार दिवसांत. मध्य-पूर्वेत बंदी असतानाही हे रेकॉर्ड! उत्तर अमेरिकेत ₹ १३१ कोटींचा वीकेंड- हा भारतीय चित्रपटाचा नवा विक्रम आहे.
चित्रपट आहे तरी काय?
आदित्य धर दिग्दर्शित धुरंधर २ ही स्पाय ॲक्शन थ्रिलर आहे. यात एक भारतीय गुप्तहेर कराचीतील गुन्हेगारी आणि राजकीय नेटवर्कमध्ये घुसखोरी करत २६/११ हल्ल्याचा बदला घेतो. रणवीर सिंग, अक्षय खन्ना, आर. माधवन, संजय दत्त आणि अर्जुन रामपाल यांच्या प्रमुख भूमिका आहेत. चित्रपटाची रनटाइम जवळजवळ चार तास असूनही प्रेक्षागृहे हाऊसफुल्ल राहिली, हे सर्वात मोठे यश!
वादातही विक्रम
दक्षिण भारतात मात्र चित्रपट वादाच्या भोवऱ्यात सापडला. मद्रास हायकोर्टात बंदीची मागणी करणारी याचिका दाखल झाली. पण या वादानेच उलट जाहिरात केली. रजनींसारख्या सुपरस्टारने केलेली प्रशंसा आणि बंदीची चर्चा यामुळे चित्रपटाची व्हिजिबलिटी आणखी वाढली.
पुढे काय?
या वर्षाच्या उत्तरार्धात रामायण (पार्ट १) येणार आहे, जो अलीकडच्या काळातील सर्वात मोठा चित्रपट मानला जातो. ‘धुरंधर २’ने त्या चित्रपटासाठी लक्ष्य उंचावून ठेवले आहे. थोडक्यात, रजनी जेव्हा “बॉक्स ऑफिस का बाप” म्हणतात, तेव्हा कॅलक्युलेटर बाहेर काढायला नको. आकडेच सारी स्टोरी सांगतात.
