मुंबईतील बाबुलनाथ मंदिर येथे महाशिवरात्री साजरी करण्याबाबत स्थानिक आमदार व राज्याचे पर्यटन मंत्री मंगलप्रभात लोढा यांच्या प्रमुख उपस्थितीत काल मंत्रालयात मंदिर ट्रस्ट व भाविक प्रतिनिधींची बैठक झाली. यंदा महाशिवरात्रीला मंदिरातील शिवलिंगावर बेल व फुल अर्पण करण्यासह जलाभिषेक करण्यासही परवानगी देण्याचा सुवर्णमध्य या बैठकीमध्ये काढण्यात आला.
बैठकीस मंदिर ट्रस्टचे अध्यक्ष नितीन ठक्कर, विश्वस्त प्रदीप श्रॉफ यांच्यासह भाविकांचे प्रतिनिधी उपस्थित होते. कोरोना काळात मंदिरात पूजाविधीबाबत प्रतिबंध लावण्यात आले होते. आयआयटीच्या एका अहवालानुसार शिवलिंगावर हळदी, कुंकू किंवा इतर पूजासाहित्य वाहिल्याने, चंदनाचा लेप लावल्याने शिवलिंगाची झीज, नुकसान होत असल्याचा दावा करण्यात आला आहे. त्यामुळे जलाभिषेकाला मज्जाव करण्यात आला होता.
दरम्यान, भाविकांमधून मात्र पूजाविधी परत सुरू करण्याची मागणी होत होती. या मुद्द्यावर मंगलप्रभात लोढा यांनी मंदिर विश्वस्त व भाविक प्रतिनिधींची मंत्रालयात बैठक घेतली. त्यात महाशिवरात्रीला बेल व फुल अर्पण करण्यासह जलाभिषेक करण्यास परवानगी देण्याचा निर्णय घेण्यात आला.
महाशिवरात्रीला बाबुलनाथ मंदिर येथे मंदिर विश्वस्तांसह पोलीस प्रशासन आदी सर्वजण भाविकांच्या मदतीसाठी असतील. भाविकांनी सहकार्य करावे. शिवलिंगाची झीज, नुकसान होणार नाही यादृष्टीने काळजी घ्यावी. भाविकांच्या भावनाही महत्त्वाच्या आहेत. मंदिर आपल्या सर्वांचे आहे. त्याची सुरक्षा ही आपली सर्वांची जबाबदारी आहे. सर्वांनी महाशिवरात्री उत्साहात साजरी करावी, असे आवाहन लोढा यांनी बैठकीनंतर केले.
