रिपब्लिकन पक्षाच्या महामेळाव्यास राज्याचे मुख्यमंत्री, उपमुख्यमंत्री तसेच अनेक मान्यवर उपस्थित राहणार असून कार्यकर्त्यांनी मोठया संख्येने सामील होऊन रिपब्लिकन पक्षाचे मुंबईतील शक्तिप्रदर्शन घडवा, असे आवाहन केंद्रीय राज्यमंत्री रामदास आठवले यांनी कार्यकर्त्यांना केले आहे.
केंद्रीय राज्यमंत्री रामदास आठवले यांच्या नेतृत्वात रिपब्लिकन पक्षाच्या मुंबई प्रदेशचा भव्य मेळावा येत्या दि. ९ एप्रिल रोजी सायंकाळी ५ वाजता मुंबईत चुनाभट्टी येथील सोमय्या मैदानात आयोजित करण्यात आला आहे. या मेळाव्यास महाराष्ट्राचे मुख्यमंत्री एकनाथ शिंदे, उपमुख्यमंत्री देवेंद्र फडणवीस, पालकमंत्री दीपक केसरकर, मुंबई उपनगराचे पालकमंत्री मंगलप्रभात लोढा, खासदार राहुल शेवाळे, खासदार पुनम महाजन, आमदार आशिष शेलार, आमदार प्रसाद लाड हे प्रमुख पाहुणे म्हणून उपस्थित राहणार असून रिपाइंचे राष्ट्रीय अध्यक्ष केंद्रीय राज्यमंत्री रामदास आठवले मेळाव्यास प्रमुख मार्गदर्शन करतील. मेळाव्याच्या अध्यक्षस्थानी रिपाइंचे मुंबई प्रदेश अध्यक्ष सिद्धार्थ कासारे उपस्थित राहतील.
येत्या दि. ९ एप्रिल रोजी सायंकाळी ५ वाजता चुनाभट्टी येथील सोमय्या मैदानात रिपब्लिकन पक्षाच्या महामेळाव्यास मोठया संख्येने उपस्थित राहण्याचे आवाहन रिपब्लिकन पक्षातर्फे करण्यात आले आहे.
मुंबई महानगरपालिका निवडणुका, नागालँड विधानसभा निवडणुकीत रिपब्लिकन पक्षाचे २ आमदार निवडून आल्याने रिपब्लिकन पक्षामध्ये चैतन्याचे वातावरण असून रिपब्लिकन कार्यकर्ते उत्साहाने मुंबई प्रदेशच्या मेळाव्यात रिपब्लिकन पक्षाचे शक्तप्रिदर्शन घडवतील, असा विश्वास यावेळी रिपब्लिकन पक्षाच्या नेत्यांनी व्यक्त केला.
