कर्करोगाशी झुंज देतानाच शाळेत विद्यार्थ्यांना चित्रकलेचे धडे देत सेवानिवृत्त झालेल्या शिक्षिका रूपा पालेकर यांच्या चित्रांचे प्रदर्शन आजपासून मुंबईच्या वर्सोवा येथील वर्सोवा वेल्फेअर हायस्कूल अँड ज्युनियर कॉलेजच्या सभागृहात सुरू होत आहे.
वर्सोवा एज्युकेशन ट्रस्ट तसेच जनता कल्याण केंद्र यांनी संयुक्तपणे या प्रदर्शनाचे आयोजन केले आहे. या प्रदर्शनात रूपा पालेकर यांनी काढलेल्या शंभराहून जास्त निसर्गचित्रांचा समावेश आहे. आज आणि उद्या सकाळी दहा ते रात्री आठ या वेळेत ते सर्वांसाठी खुले राहील. या काळात येथे चित्रांची विक्रीही केली जाईल. यातून मिळणारे उत्पन्न रूपा पालेकर यांना त्यांच्या कर्करोगाबरोबरच्या लढ्यासाठी देण्यात येईल.
मुंबईचे माजी उपमहापौर आणि वर्सेवा एज्युकेशन ट्रस्टचे विश्वस्त अरुण देव, कॅमलिन लिमिटेडचे अध्यक्ष श्रीराम दांडेकर, प्रसिद्ध लेखिका आणि कला समीक्षक साधना बहुलकर, क्लिनिकल सायकॉलॉजीस्ट के. व्ही. गणपती, वर्सोवा एज्युकेशन ट्रस्टचे विश्वस्त क्षितिज मेहता, राजन चांडोक आदी प्रदर्शनाच्या उद्घाटनाच्या वेळी उपस्थित राहणार आहेत.
