संपूर्ण राज्याचे लक्ष लागून राहिलेल्या बारामती विधानसभा मतदारसंघाच्या पोटनिवडणुकीत गुरुवारी नाट्यमय घडामोडी घडल्या. ‘राजकीय सुसंस्कृतपणा’ जपण्याच्या भूमिकेतून काँग्रेसने या निवडणुकीतून अखेर आपली माघार जाहीर केली आहे. काँग्रेसचे अधिकृत उमेदवार ॲड. आकाश मोरे यांनी आपला उमेदवारीअर्ज मागे घेतला असून, पक्षाने ही जागा लढवणार नसल्याचे स्पष्ट केले आहे. मात्र, काँग्रेसच्या या निर्णयानंतरही ही निवडणूक पूर्णपणे ‘बिनविरोध’ होण्यात अडथळे कायम आहेत. ५३ पैकी ३० उमेदवारांनी माघार घेतल्याने आता ही लढत महायुतीच्या सुनेत्रा पवार आणि इतर ३० अपक्ष उमेदवारांमध्ये रंगणार आहे.
अजित पवार यांच्या निधनामुळे रिक्त झालेल्या या जागेवर महायुतीच्या वतीने सुनेत्रा पवार रिंगणात आहेत. ही निवडणूक बिनविरोध व्हावी, यासाठी महायुतीकडून सातत्याने प्रयत्न केले जात होते. मुख्यमंत्री देवेंद्र फडणवीस यांनी स्वतः महाराष्ट्र प्रदेश काँग्रेसचे अध्यक्ष हर्षवर्धन सपकाळ यांच्याशी दूरध्वनीवरून संपर्क साधून सहकार्याची विनंती केली होती. या विनंतीला मान देऊन आणि दिल्लीतील पक्षश्रेष्ठींशी सविस्तर चर्चा केल्यानंतर, प्रदेशाध्यक्ष हर्षवर्धन सपकाळ यांनी उमेदवारी मागे घेण्याच्या शेवटच्या दिवशी मोरे यांची माघार जाहीर केली. शरद पवार यांनीही काँग्रेसला माघारीचे आवाहन केले होते. सुप्रिया सुळे यांनी नवी दिल्लीत काँग्रेस अध्यक्ष मल्लिकार्जुन खर्गे यांची भेट घेतली होती. रोहित पवार यांनी पार्थ पवार यांच्या वक्तव्याबाबत पवार कुटुंबाच्या वतीने काँग्रेस नेत्यांकडे दिलगिरी व्यक्त करून मनधरणी केली.
मोरे यांची माघार आणि सद्यस्थिती
काँग्रेस उमेदवार ॲड. आकाश मोरे यांनी माघार घेतल्याने महायुतीला मोठा दिलासा मिळाला आहे. अर्ज मागे घेण्याच्या प्रक्रियेत काँग्रेससह इतर सुमारे ३० अपक्ष उमेदवारांनी आपले अर्ज काढून घेतले आहेत. यामुळे निवडणुकीतील चुरस कमी झाली असली, तरी निवडणूक ‘बिनविरोध’ जाहीर होऊ शकलेली नाही.
हे उमेदवार अद्याप रिंगणात
काँग्रेसने माघार घेतली असली तरी, निवडणूक रिंगणात अद्याप काही आव्हानात्मक नावे कायम आहेत. प्रामुख्याने अभिजित बिचुकले आणि करुणा शर्मा यांनी आपली उमेदवारी कायम ठेवल्याने बारामतीकरांना मतदानाला सामोरे जावे लागणार आहे.
निवडणूक कार्यक्रम
प्रशासनाने दिलेल्या माहितीनुसार, आता बारामतीमध्ये २३ एप्रिल २०२६ रोजी मतदान प्रक्रिया पार पडेल आणि ४ मे रोजी निकाल जाहीर केला जाईल.
राहुरीत अक्षय कर्डिलेविरुद्ध गोविंद मोकाटे यांच्यात सामना
अहिल्यानगर जिल्ह्यातील राहुरी विधानसभा मतदारसंघाच्या पोटनिवडणुकीत उमेदवारीअर्ज मागे घेण्याच्या शेवटच्या टप्प्यात नाट्यमय घडामोडी घडल्या. माजी राज्यमंत्री आणि राष्ट्रवादी काँग्रेसचे (शरदचंद्र पवार) ज्येष्ठ नेते प्राजक्त तनपुरे यांनी निवडणुकीच्या रिंगणातून अनपेक्षितपणे माघार घेतली. त्यांच्या या निर्णयामुळे महाविकास आघाडीसमोर मोठे आव्हान उभे राहिले. मात्र, भाजपने ही निवडणूक बिनविरोध करण्यासाठी केलेले प्रयत्न पूर्णतः यशस्वी झाले नाहीत, इतर २२ उमेदवार रिंगणात कायम राहिल्याने आता इथे निवडणूक होणार आहे.
भाजपचे ज्येष्ठ नेते आणि आमदार शिवाजीराव कर्डिले यांच्या निधनामुळे ही जागा रिक्त झाली होती. भाजपने सहानुभूतीच्या लाटेचा विचार करून त्यांचे चिरंजीव अक्षय कर्डिले यांना उमेदवारी जाहीर केली आहे. दुसरीकडे, महाविकास आघाडीकडून प्राजक्त तनपुरे हे प्रबळ दावेदार मानले जात होते. मात्र, अर्ज भरण्याच्या शेवटच्या दिवशी भाजपच्या वरिष्ठ नेत्यांनी तनपुरे यांची भेट घेऊन राजकीय तणाव टाळण्याचे आवाहन केले.
माघारीचे पडसाद आणि नवी रणनीती
मुख्यमंत्री देवेंद्र फडणवीस, भाजप प्रदेशाध्यक्ष रवींद्र चव्हाण आणि पालकमंत्री राधाकृष्ण विखे पाटील यांनी प्राजक्त तनपुरे यांच्याशी प्रत्यक्ष आणि दूरध्वनीवरून चर्चा केली. मतदारसंघाच्या प्रलंबित विकासकामांना प्राधान्य देण्याचे आश्वासन मिळाल्यानंतर तनपुरे यांनी निवडणूक न लढवण्याचा निर्णय घेतला. तनपुरे यांच्या माघारीनंतर महाविकास आघाडीने तातडीने आपली रणनीती बदलली असून, राष्ट्रवादी काँग्रेसने (शरदचंद्र पवार) गोविंद मोकाटे या नव्या चेहऱ्याला मैदानात उतरवले आहे. त्यामुळे आता ही लढत प्रामुख्याने अक्षय कर्डिले आणि गोविंद मोकाटे यांच्यात होणार असल्याचे स्पष्ट झाले आहे.
मैदानातील इतर उमेदवार
निवडणूक निर्णय अधिकाऱ्यांनी दिलेल्या माहितीनुसार, अर्जांच्या छाननीनंतर सध्या २२ उमेदवार रिंगणात शिल्लक आहेत. यामध्ये वंचित बहुजन आघाडीकडून संतोष चोळके यांनी शड्डू ठोकला आहे. तसेच, शिवसेनेच्या (ठाकरे गट) काही स्थानिक नेत्यांनी अपक्ष म्हणून अर्ज कायम ठेवल्याने ही निवडणूक बहुरंगी होण्याची शक्यता आहे.
मतदानाची तयारी
राहुरी मतदारसंघातील सुमारे ३ लाख ३३ हजार मतदार २३ एप्रिल २०२६ रोजी आपला हक्क बजावणार आहेत. प्रशासकीय पातळीवर ३७४ मतदान केंद्रांची उभारणी पूर्ण झाली असून, ४ मे रोजी मतमोजणी पार पडणार आहे.
