विधान परिषदेच्या पाच जागांसाठी महाविकास आघाडी एकत्रितपणे लढणार आहे. नाशिक पदवीधर मतदारसंघात शिवसेनेच्या उमेदवार शुभांगी पाटील व नागपूर शिक्षक मतदारसंघातून सुधाकर अडबाले यांना महाविकास आघाडीने आज अधिकृतपणे पाठिंबा जाहीर केला. डॉ. सुधीर तांबे यांच्यापाठोपाठ आता नाशिक शिक्षक मतदारसंघातील अपक्ष उमेदवार सत्यजीत तांबे यांना सहा वर्षांकरीता निलंबित करण्यात आल्याची घोषणा आज काँग्रेसचे प्रदेशाध्यक्ष नाना पटोले यांनी आज एका पत्रकार परिषदेत केली.
महाविकास आघाडीच्या नेत्यांची बैठक झाल्यानंतर पत्रकारांशी ते बोलत होते. विधान परिषद निवडणुकीवरून महाविकास आघाडीत समन्वय असून शिवसेना, काँग्रेस व राष्ट्रवादी काँग्रेसच्या नेत्यांनी एकत्रित चर्चा करून नाशिक व नागपूर मतदारसंघाबाबत निर्णय घेतला आहे. नाशिक पदवीधर मतदारसंघात डॉ. सुधीर तांबे यांना काँग्रेसची उमेदवारी दिली असतानाही त्यांनी पक्षाशी बेईमानी करत अर्ज दाखल केला नाही. त्यामुळे बदललेल्या राजकीय परिस्थितीत नाशिकमध्ये शिवसेनेच्या उमेदवाराला व नागपूरमध्ये काँग्रेसपुरस्कृत उमेदवार सुधाकर अडबाले यांना मविआचा पाठिंबा आहे. विधान परिषद निवडणुकीत महाविकास आघाडीचे उमेदवार नागपूरमधून सुधाकर अडबाले, अमरावतीमधून धीरज लिंगाडे, औरंगाबादमधून विक्रम काळे, नाशिकमधून शुभांगी पाटील व कोकणमधून बाळाराम पाटील असतील. विधान परिषदेच्या या पाचही जागांवर महाविकास आघाडीतील पक्ष कार्यकर्ते एकदिलाने काम करून या पाचही जागा विजयी करतील, असे पटोले म्हणाले.
जुनी पेन्शन योजना लागू करण्यास काँग्रेसचा पाठिंबाच आहे, म्हणून तर काँग्रेसशासित राजस्थान, छत्तिसगड व हिमाचल प्रदेशात जुनी पेन्शन योजना लागू केली आहे. परंतु भाजपाशासित राज्यांत ही योजना लागू केली जात नाही. सरकारी कर्मचाऱ्यांमध्ये या मुद्द्यांवरून भाजपाविरोधात तीव्र संताप आहे. महागाई, बेरोजगारी हे मुद्देही महत्त्वाचे आहेत. नाशिकमध्ये भारतीय जनता पक्षाला उमेदवारही मिळाला नाही. भाजपा हा दुसऱ्यांची घरे फोडणारा पक्ष असून पाठीमागून वार करणाऱ्या भाजपाला जनताच धडा शिकवेल, असेही त्यांनी सांगितले.
यावेळी नाना पटोले, विधान परिषदेचे विरोधी पक्षनेते आंबादास दानवे, राष्ट्रवादीचे नेते जितेंद्र आव्हाड आदी उपस्थित होते.
