पॅरिस ऑलिम्पिकमध्ये सुवर्ण पदकाला गवसणी घालण्याच्या प्रयत्नात अपयशी ठरलेली कुस्तीपटू विनेश फोगटला हरयाणा विधानसभा निवडणुकीत आपल्याबरोबर घेण्याचा प्रयत्न काँग्रेसने चालविल्याचे चित्र दिसत आहे.
दोनच दिवसांपूर्वी हरयाणा विधानसभेच्या निवडणुकांच्या तारखा जाहीर झाल्या. या घोषणेच्या दुसऱ्याच दिवशी पॅरिस ऑलिम्पिकसाठी गेलेली विनेश फोगट परतली. १०० ग्रॅम वजन जास्त भरल्यामुळे ५० किलो वजनी कुस्तीच्या गटाच्या फायनल लढतीतून ती बाद झाली होती. यामुळे तिला कोणतेही पदक मिळाले नाही. तरीही आमच्यासाठी तूच विनर आहे, अशी भूमिका केंद्र सरकारपासून सर्व भारतीयांनी घेतली आणि त्याच थाटात दिल्ली विमानतळावर विनेशचे स्वागत करण्यात आले.
दिल्ली विमानतळावरून हरयाणातल्या तिच्या घरापर्यंत भव्य अशी विनेशची स्वागतयात्रा काढण्यात आली. यावेळी तिच्याबरोबर स्वागतरथावर कुस्तीपटू साक्षी मलिक आणि बजरंग पुनिया होते. भारतीय कुस्ती महासंघाचे वादग्रस्त माजी अध्यक्ष बृजभूषण सिंह यांच्याविरोधात लैंगिक शोषणाच्या आरोपाखाली दिल्लीत झालेल्या आंदोलनात हेच तीन कुस्तीपटू एकत्र होते. काल विनेशच्या स्वागतयात्रेतही हेच तीन कुस्तीपटू एकत्र दिसले. मात्र, यावेळी या तिघांसोबत काँग्रेसचे हरयाणातले खासदार दीपेंद्र हुड्डाही हजर होते. हरयाणात विधानसभा निवडणुका जाहीर झाल्यानंतर काँग्रेसच्या खासदारांना स्वागतरथावर स्थान मिळाल्यामुळे नजीकच्या काळात निवडणूक प्रचारात काँग्रेसच्या व्यासपीठावर विनेश फोगट दिसणार का, याकडे साऱ्यांचे लक्ष लागले आहे.