मुंबईतल्या वर्सोवा कोळीवाड्यात आलेल्या पाहुण्यांचे परंपरागत स्वागत करण्याची वर्सोवाकरांची परंपरा आहे. वर्सोवा कोळीवाड्यामध्ये केंद्रीय ग्राहक व्यवहार, अन्न आणि सार्वजनिक वितरण, वस्त्रोद्योग, वाणिज्य आणि उद्योग मंत्री पियुष गोयल यांनी काल दुपारी हिंगळादेवीचे दर्शन घेतले.
मुंबईमध्ये लोकसभा प्रवास करत असताना त्यांनी वर्सोवा कोळीवाड्याला भेट दिली. यावेळी वर्सोव्याच्या स्थानिक आमदार डॉ. भारती लव्हेकर यांनी त्यांचे शाल, श्रीफळ, तुळस व खास कोळी बांधवांची टोपी घालून स्वागत केले. यावेळी मुंबई भाजपा अध्यक्ष आमदार आशिष शेलार उपस्थित होते.
येथील वर्सोवा बसस्टॉप समोरील मसानदेवी मंदिरापासून वर्सोवाकरांची ग्रामदैवत असलेल्या पुरातन हिंगळादेवीच्या मंदिरापर्यंत कोळी नृत्य करत आणि बँड वाजवत कोळी बांधवांनी त्यांचे जोरदार स्वागत केले. यावेळी मोठ्या प्रमाणावर कोळी बांधव उपस्थित होते. वर्सोवाकरांच्या स्वागताने आणि आगत्याने तर केंद्रीय मंत्री पियुष गोयल भारावून गेले. हिंगळादेवी मंदिरामध्ये त्यांच्या हस्ते आरती करण्यात आली व तिथून परत मिरवणूक काढत मसानदेवीच्या मंदिरात येऊन येथील कोळी बांधवांसोबत त्यांनी संवाद साधला. यावेळी कोळी बांधवांनी त्यांना आपल्या प्रश्नांची निवेदने त्यांना दिली. यावेळी माजी नगरसेवक योगीराज दाभाडकर, माजी नगरसेविका रंजना पाटील, मुरजी पटेल, भाजपाचे मंडल अध्यक्ष पंकज भावे आदी मान्यवर उपस्थित होते.
