मुंबई महापालिकेवर भगवा फडकविण्यासाठी एका बाजूला शिवसेनेच्या उद्धव बाळासाहेब ठाकरे गटाचे पक्षप्रमुख उद्धव ठाकरे यांनी कंबर कसली असतानाच त्याचाच एक भाग म्हणून बोरीवली पूर्व येथील जय महाराष्ट्र नगर येथील अनंतराव भोसले मैदानावर काल रात्रीपासून सुरु झालेल्या मालवणी महोत्सवाच्या माध्यमातून शिवसेनेच्या उबाठा गटाने निवडणुकीचे रणशिंग फुंकले आहे.
ठाकरेंच्या शिवसेनेचे उपनेते विनोद घोसाळकर, विश्वनाथ नेरुरकर, शिक्षक आमदार जगन्नाथ अभ्यंकर, माजी आमदार विलास पोतनीस, विभागप्रमुख उदेश पाटेकर आदींनी याठिकाणी पालखी आणि पूजा करण्यात आलेल्या देव गिरोबाला मुंबई महापालिकेवर भगवा फडकविण्यासाठी मुंबईकरांना बुद्धी दे, असे गाऱ्हाणे घातले.
शाखा क्रमांक १४तर्फे आणि शाखा क्रमांक १२ व मागाठाणे मित्र मंडळ यांच्या संयुक्त विद्यमाने काल रात्रीपासून भोसले मैदानावर मालवणी महोत्सवाचे आयोजन करण्यात आले आहे. शनिवारी सायंकाळी ७.३० वाजता परंपरेप्रमाणे सिंधुदूर्ग जिल्ह्यातील वेंगुर्ले तालुक्यातील दाभोली येथील श्री देव गिरोबा मंदिराच्या प्रतिकृती आणि बालनगरी व बाजारपेठेचे महाआरती तसेच पारंपारिक गाऱ्हाणे घालून उद्घाटन करण्यात आले. यावेळी मागाठाणे मित्र मंडळाचे सर्व पदाधिकारी, शिवसेना (उबाठा) पक्षाचे अनेक पदाधिकारी व कार्यकर्ते मोठ्या संख्येने उपस्थित होते. माजी नगरसेवक अभिषेक घोसाळकर रंगमंच, मागाठाणे मित्र मंडळाचे संस्थापक, ज्येष्ठ राजकीय विश्लेषक विजय वैद्य स्वागत कक्ष तसेच या मालवणी महोत्सवात कोकणी संस्कृती आणि खाद्यपदार्थांची रेलचेल विविध उद्योजकांच्या माध्यमातून उपलब्ध करून देण्यात आली आहे. कोकणी खाद्यपदार्थांची मेजवानी आणि त्यांचा घमघमाट लोकांना आकर्षित करीत आहे. रोज सायंकाळी ७ वाजतां श्री देव गिरोबाची वाजंत्री तरंगासह पालखी आणि रात्री ८ वाजता दशावतार नाट्यप्रयोग सादर करण्यात येणार आहेत, अशी माहिती उत्सवप्रमुख नंदकुमार मोरे यांनी दिली. रविवार, १२ जानेवारीपर्यंत हा महोत्सव होत आहे.
