कोरोना काळात रूग्णांना भासत असलेली ऑक्सिजनची कमतरता लक्षात घेऊन मेकिंग द डिफरन्स, या संस्थेने मुंबईत विविध ठिकाणी 20 मोफत ऑक्सिजन केंद्रे उभारली आहेत.
कोरोना महामारीच्या काळात ऑक्सिजनच्या कमतरतेमुळे कित्येक रुग्णांचे मृत्यू झाले. अनेक रुग्णांचे हाल होत आहेत. अशा या कठिण प्रसंगी मेकिंग द डिफरन्स या संस्थेने मदतीचा हात पुढे करत मुंबई परिसरात 20 ठिकाणी कनेक्ट ऑक्सिजन या मोहिमेअंतर्गत ऑक्सिजन केंद्रे दिली आहेत.
मुंबईत ठिकठिकाणी उघडण्यात आलेल्या या ऑक्सिजन केंद्रांमधून गरजू रुग्णांसाठी मोफत ऑक्सिजन सिलिंडर व ऑक्सिजन कॉंसंट्रेटर पुरविण्यात येत आहेत. या कार्यात या संस्थेसोबत डोनेटकार्ट, माय ग्रीन सोसायटी आर एस एस जनकल्याण समिती, आय डी एफ़ व एन एस एस यांचादेखील मोलाचा हातभार लागला आहे.
या उपक्रमाबाबत बोलताना मेकिंग द डिफरन्स, या संस्थेचे संस्थापक दीपक विश्वकर्मा यांनी सांगितले की, सुरुवातीला मुंबईतील नागरिकांसाठी ही मोफत सेवा सुरू केली असून यानंतर महाराष्ट्रात विविध 100 ठिकाणी मोफत ऑक्सिजन सेवा सुरू करण्याचा आमचा मानस आहे. ज्या गरजू लोकांना मोफत ऑक्सिजन सिलिंडरची गरज आहे त्यांनी wwwe.mtdngo.org या संकेतस्थळावर नोंदणी करणे आवश्यक आहे.
