मुंबईकरांना प्रथमच जागतिक कीर्तीचे वाळूशिल्पकार सुदर्शन पटनायक यांच्या कलाकृतींचे प्रदर्शन बघण्याची संधी मिळणार आहे. प्रभादेवीतल्या पु. ल. देशपांडे महाराष्ट्र कला अकादमीच्या तळमजला व पहिल्या मजल्यावरच्या प्रदर्शन दालनांमध्ये हे प्रदर्शन येत्या १८ नोव्हेंबरपासून २३ नोव्हेंबरपर्यंत सकाळी ११ ते ७ या वेळेत रसिकांसाठी खुले असेल. पु. ल. देशपांडे महाराष्ट्र कला अकादमी तसेच राज्याच्या सांस्कृतिक कार्य विभागाच्यावतीने प्रथमच पटनाईक यांना प्रदर्शनासाठी निमंत्रित करण्यात आले आहे.
ओडिशा येथील समुद्रकिनाऱ्यांवर वाळूच्या माध्यमातून कलाकृती साकार करणारे सुदर्शन पटनाईक त्यांच्या अनोख्या वाळूशिल्पांमुळे जगविख्यात झाले आहेत. समुद्रकिनारी वाळूपासून ते अतिशय कलात्मक शिल्प तयार करत असून त्यांची अनेक वाळूशिल्पे सामाजिक मुद्यांवर भाष्य करणारी, जनजागृती करणारी असतात. पटनायक यांनी आजपर्यंत ६५हून जास्त आंतरराष्ट्रीय वाळूशिल्प स्पर्धांमध्ये भारताचे प्रतिनिधित्व केले आहे. पद्मश्री (२०१४), गोल्डन सॅण्ड मास्टर अवॉर्ड (२०२४) आणि युनायटेड किंग्डममधले फ्रेड डॅरिंग्टन सॅण्ड मास्टर अवॉर्ड (२०२५) यांसारख्या अनेक प्रतिष्ठित पुरस्कारांनी ते सन्मानित झाले असून त्यांची कलायात्रा गौरवली गेली आहे. गोल्डन सॅण्ड आर्ट इन्स्टिट्यूट, या संस्थेद्वारे ते नव्या पिढीतले कलाकार घडवत आहेत. अलीकडच्या काळात त्यांनी मिश्र-माध्यमातील कलाकृतींत उल्लेखनीय प्रयोग केले आहेत व अजूनही करत आहेत.
